"Mér fannst ég finna til"

Vesalings Illugi Gunnarsson, fyrrverandi aðstoðamaður vandræðabakarans í bolludagsmálinu, átti bágt með að verja vondan málstað í Silfrinu í dag. Allir gestir Silfursins, rétt eins og bróðurpartur þjóðarinnar voru á einu máli máli um að afskipti sjálfstæðismanna af Baugsmálinu sem hvað eftir annað hafa "talað sig titrandi reiða" um málið væru með öllu ólíðandi og einsdæmi í vestrænu lýðræðisríki.

Það er öllum ljóst hvernig er í pottinn búið, ef einhver var í vafa þá eyddu tölvupóstar Jóninu þeim vafa þar sem fram kom að ritstjóri Flokksblaðsins, framkvæmdastjóri Flokksins og innmúraður einkavinur (sem nú er orðinn hæstaréttardómari) Hins Ónefnda hittust á ritstjórnarkontórnum til að leggja á ráðin um aðför að Baugi. Keisarinn er allsber eins og bloggað er um í dag.

Illugi reyndi að dreifa athyglinni frá þessum staðreyndum með því að segja að Ingibjörg Sólrún væri með ósannaðar dylgjur og vitnaði í dægurlagatexta "mér fannst ég finna til". Ég kannast ekki við textann en efast ekkert um að Illuga finnist hann finna til. Sjálfstæðisflokkurinn sem pólitískt afl ætti líka að finna til - sektar. Og biðjast afsökunar.

 

Athugasemdir

[Jón Steinar Ragnarsson, 28.1.2007 kl. 21:26]

Tilvitnunin er í kvæði eftir afabróður minn Sigurð Grímsson, sem var skáld og gagnrýnandi á Morgunblaðinu. Kvæðið er að finna í ljóðabók hans "Við Langelda" og olli þessi ljóðlína miklum úlfaþyt og ritdeilum, þar sem Unuhússklíkan lagði hann í einelti.   Ástæða þess var að sjálfsögðu skrif hans og gagnrýni um rit þessara merku skálda.

Hvað Baugsmálið varðar, þá skiptir ekki miklu máli hvaðan "uppljóstrunin kom" því í ljós kom að margt vafasamt var í viðkiptaháttum samsteypunnar. Sýknudómar eru fyrst og fremst komnir til við tæknigalla í rannsókn og framsetningu málsins og afsannar ekkert um viðskiptasiðferði þessa einokunarbákns.  Sjáum svo til hvað setur, með það sem eftir situr af þessum málum kæri Dofri. 

[Heimir Lárusson Fjeldsted, 28.1.2007 kl. 22:11]

Góður Dofri, að halda hlífiskyldi yfir sakborningunum hjá Baugi þó ekki sé búið að fella dóma nema að litlum hluta.

Skattsvikin eru eftir t.d.

Það er vart á verkefnaskrá krataflokks að vernda skattsvikara.

þeir hafa líklega greitt það mikið til flokksins ykkar að þið verjið þá fram í rauðan dauðann.

[Kristján Pétursson, 28.1.2007 kl. 22:22]

Eftir að búið er að sýkna Baug af öllum upphaflegu 40 ákæruatriðum málsins,liggur fyrir ,að hér er um að ræða stærstu mistök í málsmeðferð og lögreglurannsóknum Íslandssögunnar.Við endir málsins skal upphafið skoða og það verður aðeins gert  með því,að fram fari ýtarleg heildarrannsókn á öllum þáttum frumrannsóknar málsins og tildrögum þess.Um meint ráðbrugg ákveðinna ráðmanna Sjálfstæðisfl.að upphafi málsins þarf náttúrlega að rannsaka sérstaklega.

[Heimir Lárusson Fjeldsted, 28.1.2007 kl. 23:40]

Auðvitað hafið þið varið þá í bak og fyrir og hefur Ingibjörg Sólrún ekki legið á liði sínu.

Hafið þið ekkert um skattsvikamál Baugs að segja?

Ég skora á ykkur?

[Dofri (IP-tala skráð) 29.1.2007 kl. 08:31]

Tek undir með þér Anna. Það má sannarlega bæta Írak á listann yfir það sem þeir félgar ættu að biðja þjóðina afsökunar á. Held að Írak sé reyndar ein megin ástæða þess að Halldór og Davíð hafa forðað sér úr pólitík.