Vaxandi óeining innan Sjálfstæðisflokksins með sauðfjársamninginn

Ungir Sjálfstæðismenn eru engin lömb að leika sér við. Það fær forystusauðurinn Geir H Haarde að reyna á eigin skinni nú þegar ungliðarnir renna litlu hornunum sínum í síðu hans út af sauðfjársamningnum.

Það var alltaf ljóst að ungir frjálshyggjusinnaðir Sjálfsstæðismenn gætu ekki bara kyngt og jórtrað á því í rólegheitum að einni búgrein væru réttir tugir milljarða í niðurgreiðslur. Það er því eðlilegt að þeir hafi allt á hornum sér í því efni. 

En SUSarar eru ekki einu stekkjarlömbin sem jarma sáran yfir ákvörðun sauðfjármálaráðherrans. Erla Ósk Ásgeirsdóttir, formaður Heimdallar, játaði í sjónvarpi í síðstu viku að það væri augljós ágreiningur á milli Heimdallar og þingflokks Sjálfstæðismanna um sauðfjársamninginn. Henni fannst samingurinn alveg fráleitur.

Hún er tæpast eini svarti sauðurinn í  einslitri sauðahjörð Sjálfstæðisflokksins. Heyrst hefur að þingmennirnir Birgir Ármannsson, Sigurður Kári Kristjánsson, Pétur Blöndal og frambjóðendurnir Sigríður Andersen og Illugi Gunnarsson séu síður en svo ánægðir með þennan sauðfjáraustur. Það er eðlilegt - þetta eru allt harðir frjálshyggjugemsar.

Aumingja Geir! Hann er trúlega alveg ær!

Ungir sjálfstæðismenn gagnrýna sauðfjársamning

Athugasemdir

[Heimir Lárusson Fjeldsted, 5.2.2007 kl. 17:28]

Ótrúlega fyndinn Dofri.

[Bjarni M (IP-tala skráð) 5.2.2007 kl. 17:31]

Geir eru örugglega sammála SUS eins og a.m.k. 90% sjalla (restinn eru s.k. Framsóknarmenn í Sjálfstæðisflokknum).   En er þetta ekki alltaf svona í pólitíkinni hér á landi - samsteypustjórnir og eintómar málamiðlanir; stefnuskrár eða grundvallar gildi flokkana fá ávallt að fjúka?

[alla (IP-tala skráð) 5.2.2007 kl. 17:35]

Já, eitt dæmið um samheldnina í flokknum, er það ekki ...?

[Jón Steinar Ragnarsson, 5.2.2007 kl. 19:29]

Hinn óljúfi sannleikur á bak við sauðfjársamninginn er að hér er verið að bæta enn í niðurgreiðslur til bænda, sem eru á vonarvöl vegna þrýstings frá verslanarisunum um lægra verð á afurðum.  Þarna er í raun verið að  greiða fyrir afurðirnar með almannafé, sem ekki fæst frá hinum stóru kaupendum, sem eru í aðstöðu til að halda verðinu undir sársaukamörkum. Neytandinn er því tvisvar að greiða fyrir sömu vöru auk þess sem verið er að flytja ríkisfjármagn óbeint á hendur auðblokkanna. Hmmm, skildi samfylkingin ekki vera nokkuð sátt við það?

[Dofri Hermannsson (IP-tala skráð) 5.2.2007 kl. 20:48]

Jón Steinar minn, þú ert nú of gamall og vitur fyrir svona raus eins og þetta í lokin. Hitt er rétt hjá þér að niðurgreiðslurnar skila sér engan veginn til bænda, svo er útflutningskyldan afnumin og þá verður offramboð á lambakjöti og verðið fellur enn meira. Útflutningurinn er hins vegar bara til að tapa á honum, við erum að fá innan við 200 kall fyrir kg sem við borgum 350 kall til að láta framleiða.

Í mig hringdi hrossabóndi um daginn og spurði hvaða dauðans rugl þetta væri. Ekki það, hann væri sammála því að setja 20 milljónir í landsbyggðina, það væri gott að styrkja byggðina og hvetja ungt fólk til að setjast þar að. Hins vegar skildi hann ekki að það þyrftu endilega að vera skilyrði að fólk væri með rollur. Hvað með hrossaræktendur, ferðaþjónustuaðila, smiði eða venjulegt ungt fólk sem gæti t.d. unnið heiman frá sér við rannsóknir, hönnun, forritun eða eitthvað annað? Er einskis virði að þetta fólk vilji búa á landsbyggðinni af því það er ekki með rollur?

Einn af stórhöfðingjum í leikarastétt, reyndar tengdur ráðherra í Sjálfstæðisflokknum, náði heldur ekki upp í nefið á sér af hneykslun yfir þessum foráttubjálfalega sauðfjársamningi. Hann kom með skemmtilega tillögu sem ég er viss um að fellur þér vel í geð.

Hann vill leggja ofurtolla á íslenska leiklist og kvikmyndagerð til verndar íslenskum leiklistar- og kvikmyndabændum! Vill láta kosta 3000 kall inn á erlendar kvikmyndir til að jafna stöðu íslenskra mynda gagnvart erlendum. Ég held að við ættum að stíga þetta skref til fulls og leggja ofurtolla á erlenda tónlist, á allar útlenskar bækur og tímarit. Hvers eiga tónlistarbændur og ritbændur að gjalda?

[Jón Steinar Ragnarsson, 6.2.2007 kl. 00:09]

Hérna er ég sammála þér elsku vinur um að þetta er foráttuvitlaus ráðstöfun og ekki studd með neinum afgerandi rökum.  En landbúnaður má ekki deyja útaf og það er spurning hvort hann geri það nokkuð án þessara afskipta heldur lagi sig að stærð og verði skilvísari.  Öll samanburðarfræði við aðrar greina þarna er háll og ótraustur ís. Allir vilja meira úr ríkishýtinni.  Ég held þó að bændur, samkvæmt mínum kynnum, hafi það ekkert afgerandi gott og þeir eru að fá skítt fyrir sitt.  Það er þó ekki til aðhalds í rekstri að dæla endalaust af bytlingum inn í þetta og koma mönnum upp á lagið með að stóri bróðir hlaupi undir bagga. Menn þróa ekki með sé viðskiptavit þannig.  Svo er það nú með blessaða bændurna að þeir eru eylönd og óljúft að vinna saman eins og reyndar á við um í fleiri greinum.  Ég væri til í að borga samvinnu og samkiptanámskeið og eldingarkúrs í hagfræði.  Vandinn er væntanlega að hluta til innanfrá.  Því er samt ekki að neita að það er ekki gróði af viðskiptum þeirra við innanlandsverslun, frekar en útflutningi.  Skíttast er að þurfa að borga tvisvar fyrir klabbið. Eini hagnaðurinn er í pyngjur verslunarinnar, sem hefur súperálagningu á þetta snautlega innkaupsverð.  

Rausið eins og þú kallar það er nú á léttari nótunum, svona til að stríða þér.  Réttlætingar þínar á okurveldi Baugs hér í bloggtjörninni er jú svolítið skondnar fyrir Sósíaldemókrata. Þið verðið að fara að snúa ykkur út úr því paradoxi til að verða trúverðugir fulltrúar fjöldans. Bara svona svo ég ráði þér heilt upp á fornan vinskap.

[Dofri Hermannsson, 6.2.2007 kl. 00:30]

Hef alls ekki haldið uppi vörnum fyrir okur neins staðar og allra síst hjá Baugi. Hef hins vegar skammast út í stjórnvöld sem halda að þau geti notað ríkissaksóknara og dómskerfið til að klekkja á fólki sem þau "hafa óbeit eða fyrirlitningu á" svo notuð séu orð ónefnds manns.

Burt með okrið (sem og hokrið)

[Óðinn Þórisson (IP-tala skráð) 6.2.2007 kl. 08:45]

Sæll Dofri

Samkvæmt nýjustu skoðanakönnun virðast menn bara vera nokkuð sáttir við Sjálfstæðisflokkinn en áhuginn á sf sem er orðinn 3 stærsti flokkur landsins virðist bara vera minnkandi.

Ef ég væri þú þá myndi ég halda áfram að stinga hausnum í sandinn og telja mér trú um að allt sé í lagi.

Sjálfstæðisflokkurinn - 45,5%
VG - 22,9%
Samfylkingin - 19,1%
Framsóknarflokkurinn 9,4%
Frjálslyndi flokkurinn 3,1%

Þetta eru skýr skilaboð, ríkisstjórnin heldur velli, fólkið er sátt við störf og stefnu hennar og við bara vonum að þetta verði niðurstaðan þá gerist tvennt gott, ríkisstjórnin heldur áfram sínu góða starfi og isg hættir í pólitík. xd

[Sigurjón Sveinsson, 6.2.2007 kl. 09:45]

Þessir "frjálshyggjugemsar"eins og þú kallar þetta ágæta fólk svo skemmtilega, eru greinilega ekki óvinsælir, miðað við skoðannakannanir. Frekar má segja að "afturhaldskommatittirnir" (segi þetta svona til að vera sama leveli og þú) í Samfylkingunni séu ekki að hitta í mark þessa dagana.
Ég er hér að rífa kjaft því ég er sjálfur "frjálshyggjugemsi" sem líkar illa þegar talað er niður til mín. Það er alveg hægt að ræða þjóðmál án þess að stíga í sandkassa uppnefninga a la Hallgrímur Helgason og fleiri.

[haukur (IP-tala skráð) 6.2.2007 kl. 10:28]

Jæja Dofri, nú er kátt á hjalla.  Hvort ætli sé sannara, meint ólga innan Sjálfstæðisflokksins þar sem fylgið mælist nú tæplega 46%, eða rífandi sátt og eining innan Samfylkingarinnar þar sem fylgið er komið í rétt rúm 19%?  Haltu bara áfram að jarma, kallinn minn, því meira sem þú, Guðmundur Steingrímsson, og Ingibjörg Sólrún blaðrið, því hraðar tætist fylgið af flokknum ykkar. Sumir myndu taka þetta persónulega, og líta á sem svo að kjósendum einfaldlega byði við ykkur sem stjórnmálafólki og gæti frekar hugsað sér að fara í botnlangauppskurð án deyfingar frekar en að sjá ykkur stjórna hlutunum, en ég vona að þið hafið breiðara bak en svo.  Hver veit?  En haltu endilega áfram að tönnlast á því hvað allt sé að fara fjandans til á Íslandi, hversu gríðarlega vondur Sjálfstæðisflokkurinn er, það er greinilega að svínvirka..... bara fyrir rangan flokk.

[haukur (IP-tala skráð) 6.2.2007 kl. 10:28]

Jæja Dofri, nú er kátt á hjalla.  Hvort ætli sé sannara, meint ólga innan Sjálfstæðisflokksins þar sem fylgið mælist nú tæplega 46%, eða rífandi sátt og eining innan Samfylkingarinnar þar sem fylgið er komið í rétt rúm 19%?  Haltu bara áfram að jarma, kallinn minn, því meira sem þú, Guðmundur Steingrímsson, og Ingibjörg Sólrún blaðrið, því hraðar tætist fylgið af flokknum ykkar. Sumir myndu taka þetta persónulega, og líta á sem svo að kjósendum einfaldlega byði við ykkur sem stjórnmálafólki og gæti frekar hugsað sér að fara í botnlangauppskurð án deyfingar frekar en að sjá ykkur stjórna hlutunum, en ég vona að þið hafið breiðara bak en svo.  Hver veit?  En haltu endilega áfram að tönnlast á því hvað allt sé að fara fjandans til á Íslandi, hversu gríðarlega vondur Sjálfstæðisflokkurinn er, það er greinilega að svínvirka..... bara fyrir rangan flokk.

[Haukur Nikulásson, 6.2.2007 kl. 11:01]

Skemmtileg lesning Dofri. Takk!

[Dofri Hermannsson, 6.2.2007 kl. 12:38]

Ágæti Óðinn. Já það er kannski bara það eina sem dugar í íslenskri pólitík. Að tala alls ekki um hana. Operation Strútur er sennilega bara góð taktík. Ekki eru strútar útdauðir - málið sannað! Ég gefst upp. Héðan í frá skal ég bara segja góðar fréttir. Ég gæti þurft að sleppa því að tala um einhverja flokka í ýmsum málum en só bí it! Ég tek þessum orðum ykkar spjallvina minna sem hvatningarorðum. Nú skal ég brosa af ykkur fylgið á næstu vikum!

Kæri Sigurjón. Mér hefur alltaf fundist gemsi vera mjög fallegt orð. Hvað er fegurra en einmitt unglingslamb sem hefur verið sett á vetur og á framtíðina fyrir sér. Svo er gemsi auðvitað til sem orð yfir farsíma þó sú merking eigi ekki við hér. En semsagt "frjálshyggjugemsi" er í mínum huga frjálshyggjulamb sem hefur ekki verið slátrað heldur sett á, er komið er á unglingsaldur og á framtíðina fyrir sér. Óþarfi að vera móðgaður yfir því lambið mitt.

Haukur - skemmtilegt þetta með botnlangauppskurðinn. Myndi skrifa það niður og nota það síðar ef ég væri ekki búinn að ákveða að vera alltaf jákvæður héðan í frá.

Varðandi könnunina sjálfa - var þetta villa með kynjaskekkjuna eða er það virkilega rétt að af þessum 350 sem gáfu upp afstöðu hafi aðeins um 40% verið konur? T.d. í hinu svokallaða fylgi Samfylkingar sýndist mér 62% vera karlar og 38% konur. Var símasambandslaust við konur þennan laugardagseftirmiðdag? Nú er það vitað að fylgi Samfylkingarinnar er allt að 60/40 konum í vil svo það getur haft töluverð áhrif á niðurstöðuna ef ekki næst í konur. Ég bara velti þessu upp - gæti það skýrt aukningu Sjálfstæðismanna sem er kallaflokkur og lækkun Samfylkingar sem er meira kvennaflokkur?

Býst svo sem ekki við að þið stökkvið á þessa skýringu - en engu að síður athyglisvert að það skuli vera um 216 karlar á bak við svörin en aðeins um 130 konur. Ég er ekki sannfærður um að það gefi rétta mynd. Ekki það að þrátt fyrir að þetta væri röng niðurstaða og Gallup sýndi raunsanna stöðu þá er það alls ekki ásættanleg útkoma úr kosningum. Enda hef ég enga trú á að svo verði.