Vel heppnað kvöld á Víni og skel

Það á að láta vita af því sem vel er gert og í kvöld hef ég ástæðu til að hæla góðum veitingastað.

Í kvöld fórum við nokkur út að borða á Vín og skel á Laugaveginum. Staðurinn er notalegur, þjónustan fyrsta flokks, maturinn enn betri og fallega borinn á borð.

Við fengum okkur fjölbreytta forrétti og ljúffenga aðalrétti þar sem fiskur, humar, krabbi og skel voru í aðalhlutverkum. Sérvalið vín samkvæmt ráðleggingum hússins rann ljúflega niður með veitingunum og það gerði líka kaffið með desertnum. Allt á hóflegu verði.

Vel heppnað kvöld og óhætt að mæla bæði með matnum, stemningunni og þjónustunni hjá Kristjáni Nóa, eiganda staðarins.

Athugasemdir

[Edda Agnarsdóttir, 13.1.2008 kl. 00:59]

Alltaf gott að fá svona meðmæli með veitingastað! Takk.

[Hjörtur (IP-tala skráð) 13.1.2008 kl. 19:02]

Hljómar vel. Ég hef lengi ætlað að prófa hann af því ég hef heyrt vel af honum látið, en tók eftir því að hann var ekki lengur á gamla staðnum. Eru þeir enn einhvers staðar á Laugaveginum?

[Stefán Gíslason (IP-tala skráð) 15.1.2008 kl. 22:49]

Heppinn frændi! Ég fór á þennan sama stað í haust við sjötta mann á leið í leikhús. Eftir rúmlega einn og hálfan tíma var ljúffengur forréttur löngu runninn niður, en ekkert farið að bóla á aðalréttinum þrátt fyrir nokkrar ítrekanir. Tókum að lokum þá ákvörðun að borga forréttinn, afþakka frekari viðskipti og hlaupa af stað. Náðum leikhúsinum með herkjum, sársvöng. Seinna um kvöldið komum við við í Ártúnsbrekkunni, og þar borðaði ég bestu pylsu sem ég hef fengið lengi!

Forrétturinn fékk hæstu einkunn, en heildareinkunnin var núll komma hérumbilekkineitt.