Bæjarstjórinn í Reykjanesbæ fer með fleipur

Árni Sigfússon, bæjarstjóri í Reykjanesbæ, færir þau rök helst fyrir nauðsyn álvers í Helguvík að Suðurnes séu mikið láglaunasvæði. Þetta er rangt. Hann hefur líka talað um mikið og landlægt atvinnuleysi á Suðurnesjum, sem er líka rangt.

Ef farið er á vefi Hagstofunnar og Vinnumálastofnunar sést að atvinnuleysi á Suðurnesjum er í heild um 1.2%. Atvinnuleysi er 0,9% hjá körlum en nokkuð meira eða 1,6% hjá konum á Suðurnesjum. Þetta eru tölur sem í reynd þýða að ekki er um neitt atvinnuleysi að ræða.

Það er undarlegt að heyra í bæjarstjóranum þennan sífellda barlóm, heyra hann tala niður bæði byggðina, fólkið og störfin sem það vinnur. Sérstaklega þegar ekkert af því á við rök að styðjast. Reyndar sýna mannfjöldatölur að á síðustu árum hefur fólki á Suðurnesjum einmitt fjölgað mjög, úr 16.802 árið 2003 í 20.446 í ársbyrjun 2008 eða um 22% á þessum tíma. Margir bæjarstjórar væru bara býsna sáttir við þessa þróun. En ekki Árni.

Í fréttum Rúv í gær sagði hann:

Þetta er mikið láglaunasvæði sem að menn eiga að þekkja sem að um fjalla. Þannig að það væri gott að allir þingmenn séu með það líka á hreinu. Þetta snýst ekki bara um atvinnuleysi þetta snýst um það að skapa fólki góð laun og vel launuð störf og örugg störf. Það er það sem við erum að gera hér.

Kíkjum aðeins nánar á þetta og tökum til samanburðar Vesturland og Suðurland sem hvort tveggja eru svæði rétt utan höfuðborgarsvæðisins. Samkvæmt Hagstofunni, sem er einmitt með þetta á hreinu, eru meðalatvinnutekjur á Suðurnesjum lítið eitt hærri en á Vesturlandi og talsvert hærri en á Suðurlandi. Þó er hér um að ræða tölur frá 2005 og ljóst að mikill uppgangur hefur verið á svæðinu síðan. Sjá mynd.

Þetta finnst mér að bæjarstjórar eigi að þekkja sem um fjalla. Maður spyr sig hvað veldur því að bæjarstjórinn í Reykjanesbæ fer með þvílíkt fleipur. Veit hann ekki betur eða gengur honum eitthvað annað til? Er álverið í Helguvík áfangasteinn á pólitískri vegferð bæjarstjórans? Heppilegur bautasteinn þegar kemur að næstu Alþingiskosningum? Klæði í ráðherrakápu?

Það er erfitt að vera riddari á hvítum hesti þegar engum þarf að bjarga.

Athugasemdir

[Kjartan Pétur Sigurðsson, 12.3.2008 kl. 13:07]

Sökum fámenni þjóðarinnar, þá veitir ekki af nokkrum stóriðjuverum til viðbótar. Hvernig eigum við annars að lifa af á þessum erfiðu tímum?

[Örvar Þór Kristjánsson, 12.3.2008 kl. 13:15]

Dofri minn

Tölur frá 2005, ´þá var Varnarliðið inní þessu.  Fjöldi starfsmanna sem vann við góð störf og hafði umtalsvert betri tekjur en gengur og gerist í dag.  Veit þetta því ég bý á svæðinu og vann hjá hernum.  Sæki mína vinnu suður í Reykjavík eins og gríðarlegur fjöldi íbúa af suðurnesjum.  Ekki misskilja, ég er sáttur enda hjá frábæru fyrirtæki en margur sækir vinnu til höfuðborgar af illri nauðsyn.  Sambærileg störf eru ekki til í Reykjanesbæ t.d

Þó svo atvinnuleysi sé ekki mikið núna er útlitið ekki bjart.  Það er því ekkert af því að hugsa fram í tímann og ekki grípa til aðgerða of seint.  Álver í Helguvík er góður kostur, fín störf sem gefa vel.  Það er yfirgnæfandi meirihluti íbúa hér á svæðinu sem vilja þetta og einfalt dæmi að þetta er okkur öllum til heilla.  Úmhverfisverndarsjónarmið eru veik í þessu máli.  Meiri hagsmunir fyrir minni.

Árni er að vinna vel, hann er að gera svæðið enn sterkara og betra.  Við höfðum herinn, hann fór og við tókum vel á þeim vanda.  Eitt stykki Álver er meira en velkomið og satt best að segja er það undarlegt að sjá þig Samfylkingarmann vera svo mótfallinn þessu.  Veit að samflokks félagar þínir margir fyrir sunnan eru þér ekki sammála og eins og einn gamall jafnaðarmaður sagði við mig um daginn "þá væri hann Dofri flottur í VG" Þessu var ég svo innilega sammála

[Gísli Baldvinsson (IP-tala skráð) 12.3.2008 kl. 13:29]

Það vantar norðurland í þennan samanburð. Þá sjá menn enn lægri tölur.

[Dofri Hermannsson, 12.3.2008 kl. 13:54]

Já það er rétt að norðurlandið er lægra. En Örvar minn.

Víst er það bagalegt að ekki skuli vera til nýrri tölur um vinnumarkaðinn eftir svæðum en frá 2005. Ég efast nefnilega um að það sé rétt hjá þér að Kaninn hafi borgað svo mikið hærra en almennt gerist að það dragi Suðurnesin niður. Fólki hefur fjölgað mikið á svæðinu og margir starfa nú á höfuðborgarsvæðinu sem er þrátt fyrir allt með hæstu meðallaunin af öllum svæðum landsins.

Ef menn hlusta bara á Á.S. er ég viss um að svartsýnin á greiða leið í hræddar sálir. Það sem væri hins vegar vert að óttast eru þau áhrif sem álver í Helguvík mun hafa á vaxtalækkunarferlið og verðbólguna. Fyrir hvert ár sem það tefst að ná vöxtum niður um 5% blæðir almenningur 75 milljörðum. Fyrir hvert ár sem það dregst að ná verðbólgu niður um 4% bætast 40 milljarðar við höfuðstól verðtryggðra lána heimilanna. Þetta eru um 1,8 milljón á hverja fjögurra manna fjölskyldu á ári.

Ekki veit ég hvar í flokki þú ert Örvar, en svona úr því þú vilt raða mér niður í flokkakerfinu leyfi ég mér að stinga upp á þú hallir þér að Sjálfstæðisflokknum. Það er einkum vegna þess að þú virðist gagnrýnislítið þrá sterkan foringja með fasi riddarans á hvíta hestinum.

[Rauða Ljónið, 12.3.2008 kl. 14:25]

Sæll, Dofri

Ég skil vel stefnu Samfylkingarinnar í launamálum til handa hinum almenna vinnandi manni.

Hvað hefur hann að gera með há laun hann á að vera láglaunamaður og bíta dauðann úr skel, koma börnum sínu ekki til mennta berjast við fátækt, svo langt er verkalýðsarmurinn í Samfylkingunni kominn nú.

Talið er samkvæmt spám að Helguvikurframkvæmdin hafi 0,2% til 0,3 % áhrif á verðbólgu.

Kv, Sigurjón Vigfússon

[Örvar Þór Kristjánsson, 12.3.2008 kl. 14:26]

Sæll aftur Dofri, þakka sjót svör

Rétt er það, ég kaus Sjálfstæðisflokkinn síðast og þarsíðast.  Enda hefur nú bara gengið óskaplega vel með þann ágæta flokk í forustu.  Samfylkingin komin í Ríkisstjórn og samstarfið lofaði góðu þrátt fyrir nokkra "veika" hlekki innan Samfó. ( Förum ekkert nánar í það )  Þakka samt fyrir á hverjum degi að Sjálfstæðisflokkurinn fór ekki í samstarf með VG enda niðurrifssegir af verstu gerð.

Veistu að ég er nokkuð viss um að herinn dragi meðaltalið niður, samt kannski ekkert svo rosalega en herinn gerði vel við margann það veit ég vel.  Margur eins og ég sagði áðan stundar vinnu sína á höfuðborgarsvæðinu, keyrir 2x50 mín á dag til vinnu vegna þess að sambærilega launuð störf finnast ekki í heimabyggð.  Það tekur þú undir með mér "Fólki hefur fjölgað mikið á svæðinu og margir starfa nú á höfuðborgarsvæðinu sem er þrátt fyrir allt með hæstu meðallaunin af öllum svæðum landsins"  Þetta er einmitt málið, þekki marga persónulega sem myndu kjósa það að vinna fyrir sunnan, sleppa við keyrslu.  Því er brýnt að fá inn atvinnurekanda sem bíður uppá vel launuð störf og það nokkuð mörg.

Ótti þinn er ekki á rökum reistur, þessi útreikningur þinn er afar torkennilegur og talandi um svarsýni.  Árni er bara að vinna að hlutunum fyrirfram, er framsýnn og hann hefur sýnt kraft og þor í þessu máli.  Menn mættu taka hann til fyrirmyndar amk í þessu máli

[Lára Hanna Einarsdóttir, 12.3.2008 kl. 16:46]

Var sjálf að skrifa færslu um kokhreysti bæjarstjórans og svikamylluna á Suðurnesjum.  Hver er tilgangurinn með þessu?  Að valta yfir bæði almenning og stjórnkerfið?

[Lára Hanna Einarsdóttir, 12.3.2008 kl. 16:54]

Ég má til með að benda Örvari Þór á þá hryggilegu staðreynd að allt tal hans um að umhverfisverndarsjónarmið hvað álver í Helguvík varðar snertir ekki bara Suðurnesjamenn og meiri hagsmuni fyrir minni.  Eins og hann getur lesið í færslunni minni sem ég benti á hér að ofan er umhverfisþátturinn í kringum þetta eina álver alveg gígantískur og snertir ALLA íbúa suðvesturhornsins.  Það má ekki gleyma tengdum framkvæmdum, þ.e. þeim virkjunum sem ætlað er að veita orku í álverið með tilheyrandi brennisteinsvetnismengun og eyðileggingu á náttúruperlum og öllum háspennulínunum sem þyrfti að reisa suður með öllu Reykjanesinu.

Það er svo langt í frá að álver í Helguvík snerti Suðurnesjamenn eina!

[Hannes Friðriksson , 12.3.2008 kl. 17:09]

Blessaður Dofri

Það er örugglega mjög þægilegt að sitja inni í Reykjavík,og fletta upp í hagtölum frá árinu 2005, þegar herinn var hér. það vita allir sem vilja vita að laun þeirra sem þar unnu voru í flestum tilfellum vel yfir meðatals launum á þeim tíma. Það er breytt. Allt frá upphafi umræðu um Álver í Helguvík höfum við íbúar Suðurnesja verið þeirra gæfu aðnjótandi að um þetta mál hefur skapast nær einróma samstaða,þvert yfir alla flokkapólitík hafa menn verið sammála í þessu máli. Það hefur ekkert með persónu Árna Sigfússonar að gera. Þetta er því miður ekki neinn barlómur í Árna, þetta er bara nokkuð nálægt sannleikanum hjá honum.Það er ekkert sjálfsagt að yfir 30% íbúanna (þetta er meira huglægt mat en vísindalegt) þurfi að ferðast um það bil 80 km hvern dag til að sækja vinnu.

                                                      Bestu kveðjur

                                         Hannes Friðriksson

[Örvar Þór Kristjánsson, 12.3.2008 kl. 17:16]

Svikamylla.  Það vantar ekki stóru orðin.  Las þennan pistil þinn sem er ansi vel settur upp en annað er ekki merkilegt.  Það geislar bara af þér beiskjan í garð þessa Álvers.  Náttúruverndarsjónarmið, viljið þið reisa þessi Álver í þeim löndum þar sem þau eru knúin áfram af kolum?  Sama fólk og nýtir sér Álafurðir á hverjum degi.  Hvar er samræmið?  Á íslandi er umhverfisvænni orka en annarsstaðar. Það er staðreynd.  Við eigum að virkja og nýta hana.

[Óðinn Þórisson, 12.3.2008 kl. 20:04]

dofri er einn alheitasti andstæðingur álvera sem fyrirfinnst á landinu ásamt flokksmönnum í íslenska kommúnistaflokkinum þannig að maður tekur mið af því þegar maður les hans pistla. ás hefur sagt að hann gefi ekki mikið fyrir orð dofra.
ég vona að þetta gangi upp og að suðunesjamenn fái að vinna þetta án frekari utanaðkomandi afskipta. 

[Ingólfur, 13.3.2008 kl. 13:11]

Já Örvar, mikil er gæfa Íslendinga að hér skuli renna ár og hér sé hiti í jörðu.

Slíkt þekkist nefnilega ekki í öðrum löndum og því er það skylda okkar að fullvirkja landið sem fyrst.

En bíddu aðeins. Nú minnir mig endilega að ég hafi séð ár í útlöndum og jafnvel goshveri.

Á sumum stöðum, líka í þróunnarríkjunum, er fólk einmitt að virkja þessa orku vegna þess olían er rándýr og vegna þess að þeim fjölgar ört löndunum sem gangast undir skuldbindingar um minnkun á losun gróðurhúsalofttegunda.

Annarstaðar er hins vegar ekki hreyft við þessari orku vegna þess að þeir meta einstaka náttúruna meira en orkunnar sem hægt er að ná úr henni.