Losun frá Norðuráli langt umfram spár vekur spurningar um bestu fáanlegu tækni

Í frétt frá umhverfisráðuneytinu kemur fram að losun gróðurhúsalofttegunda hefur aukist um 527.000 tonn, eða 14,2% frá árinu 2005 til ársins 2006.

Losun frá samgöngum jókst um 146.000, eða um 17%, að langmestu vegna vegasamgangna.

Mestu munar þó að aukin losun frá áliðnaði var mun meiri en áætlað hafði verið, 404.000 tonn, eða um 89%. Aukningin er öll frá álveri Norðuráls á Grundartanga og var hluti hennar viðbúin vegna stækkunar en .

Miðað við áætlanir Norðuráls hefði losun CO2 átt að aukast um 160 þúsund tonn við stækkun upp í 220 þúsund tonna framleiðslugetu og losun PFC um 40 þúsund tonn af CO2 ígildum eða samtals um 200 þúsund tonn. Reyndin varð hins vegar 185 þúsund tonna aukning í CO2 og 319 þúsund tonna aukning í losun PFC mælt í CO2 ígildum.

Hluti aukningarinnar er losun CO2frá iðnaðarferlum, sem fellur undir íslenska ákvæðið svokallaða, en losun flúorkolefna (PFC), fellur ekki undir íslenska ákvæðið og dregst því frá almennum heimildum.

Það er ástæða til að vekja athygli á því að samkvæmt íslenska ákvæðinu er aðeins hægt að úthluta losunarheimildum til þeirra fyrirtækja sem nota bestu fáanlegu tækni á hverjum tíma. Það er ljóst að annað hvort hefur allt farið úrskeiðis hjá Norðuráli eða að tæknin sem fyrirtækið notar er léleg.

Þetta er sama tækni og Norðurál hyggst nota í Helguvík, verði af framkvæmdum þar. Ef sú tækni er ekki sú besta sem völ er á verður ekki annað séð en að umhverfisráðherra verði að synja Norðuráli um frekari losunarheimildir. Kjósi Norðurál að skipta um tækni í fyrirhuguðu álveri sínu hlýtur það að vera talsverð breyting sem kallar á endurmat á umhverfisáhrifum þess.

Losun gróðurhúsalofttegunda jókst um 14%

Athugasemdir

[Dofri Hermannsson, 23.4.2008 kl. 16:12]

Axel. Ég á erfitt með að sjá hvernig öfugmæli þín tengjast of mikilli losun Norðuráls á gróðurhúsalofttegundum!

[Dofri Hermannsson, 23.4.2008 kl. 17:31]

Alex, bið afsökunar á illri meðferð á nafni þínu. Veit af eigin raun hve hvimleitt það getur verið.

[Gestur (IP-tala skráð) 24.4.2008 kl. 10:23]

Mjög góður punktur varðandi norðurál. Því miður virðist Ísal vera eina álverið á landinu sem hefur metnað. Eftir að stjórnvöld fóru að leita ljósum logum eftir frekari fjárfestingu í áli, varð niðurstaðan Alcoa og Norðurál, sem hvorugt hefur sýnt metnað í umhverfismálum. Þetta iðnaðarhverfi í Hvalfirði er reyndar algerlega til skammar, það er bæði járnbræðslan og Norðurál, þarna stígur upp svartur reykur og rafmagnsmöstrin ryðga (Hugsanlega vegna þess hve mikil kolsýra er í andrúmsloftinu - það er súrt regn osf? ).

Athyglisverð frétt um daginn þar sem aðrir iðnaðarkostir voru teknir fyrir í stað álvers í helguvík, þar kom í ljós að eftirspurn eftir orku er gríðarleg, hvernig stendur þá á því að við veljum jafn orkufrekan iðnað eins og Álframleiðslu, og gefum svo beinlínis rafmagnið á þeim tíma sem hvað mest verð fæst fyrir orku. Í ljós kom að í staðinn fyrir eitt álver mátti byggja tvær kísilverksmiðjur, nokkur netþjónabú, koltrefjavinnslu osf....

Er ekki kominn tími til að við förum að sjá eitthvað til Samfylkingarinnar? Hvenær verður kynslóðabreytingin sem allir bíða eftir, það er fullt af hæfileikaríku fólki í Samfó en menn hafa ekki óendalega þolinmæði að bíða eftir að kjördæmapólitíkusarnir og refirnir eins og Össur og Kristján Möller úreldist af sjálfu sér. Ef fram heldur sem horfir hefðum við verið betur sett með Framsókn og Sjallana!