Skóflustunga að vaxtarsprotum í Helguvík

Græna netið og Ungir Jafnaðarmenn tóku á föstudaginn skóflustungur að nýjum vaxtarsprotum í Helguvík. Þetta var gert til að benda á að á Suðurnesjum er mikið af góðum tækifærum til atvinnuuppbyggingar og að því væri leitt að Hitaveita Suðurnesja skuli ekki sjá sér fært að sinna neinu nema orkuöflun til álvers í Helguvík.

Eða eins og fram kemur í ársskýrslu HS 2007:

Á árinu var gerður orkusamningur við Norðurál um raforkusölu til fyrirhugaðs álvers í Helguvík... Ljóst er að tíminn er stuttur þannig að allt verður að ganga upp svo orkuafhending geti hafist á réttum tíma . Mikil ásókn hefur verið í raforku til notenda sem þurfa 10 - 50 MW fyrir sína starfsemi . Ljóst er að ekki verður hægt að verða við óskum þessara aðila nema að litlu leyti...

Með framtakinu vildu Græna netið og UJ líka benda á að gríðarleg umframlosun Norðuráls á Grundartanag vekti áleitnar spurningar um

1. hvort verið væri að nota bestu fáanlegu tækni,
2. hvort ítrekuð mistök hefðu átt sér stað við notkun hennar 
3. hvort umhverfisráðherra geti yfir höfuð látið fyrirtækið hafa losunarheimildir af kvóta íslenska ákvæðisins en þeim má aðeins veita til fyrirtæki sem nota bestu fáanlegu tækni á hverjum tíma. 

Plöntuðu vaxtarsprotum í Helguvík

Athugasemdir

[Gísli Baldvinsson (IP-tala skráð) 27.4.2008 kl. 13:50]

Fjölmiðlar höfðu takmarkaðan áhuga á þessari ágætu athöfn. Gott íhugunarefni.

[Lárus Vilhjálmsson, 27.4.2008 kl. 14:04]

Líklega hefði það vakið meiri athygli ef að vaxtarsprotarnir hefðu verið gróðursettir við heimili formanns og varaformanns Samfó til að minna á tilvist fagra Íslands:)

[Gestur Guðjónsson, 27.4.2008 kl. 14:53]

Mér fannst nú áhugi og birting fjölmiðla á þessu máli talsverð og sanngjörn. Þetta er góð leið til að vekja athygli á málstaðnum.

Reyndar var ekki spurt hvers vegna allir þeir umhyggjusömu Samfylkingarmenn sem tóku þátt í gjörningnum sem ég þekkti, voru úr Reykjavík, en ekki af Suðurnesjum...

[Gísli Sigurðsson, 27.4.2008 kl. 16:12]

Þetta er fínn punktur hjá þér Gestur. Það eru þessir besservisserar úr 101 sem virðast  endilega þurfa að hafa vit fyrir þessum kjánum úti á landi, hvort sem það er á Austurlandi, Þingeyjarsýslum eða þá eins og í þessu tilfelli Suðurnesjamönnum.

[Dofri Hermannsson, 27.4.2008 kl. 16:25]

Þarna var reyndar einn suðurnesjamaður og þeir hefðu viljað vera fleiri en sumir komust einfaldlega ekki frá vegna vinnu (kl. 15.15).
Hitt er svo auðvitað alveg rétt hjá Gísla að oft þurfa þeir sem vita betur að hafa vit fyrir þeim sem ekki vita betur.
Þeir þurfa samt ekkert endilega að vera úr 101, geta rétt eins verið úr 112, 200, 371, 380 eða 600 eins og ég sjálfur!

[Gísli Sigurðsson, 27.4.2008 kl. 17:23]

Dofri, hélt reyndar að þú byggir í 112 en ekki 600. Ég sjálfur bý í 310 nú um stundir en stefni á 230 bráðlega. Skemmtilegur talnaleikur? veit ekki.

[Dofri Hermannsson, 27.4.2008 kl. 19:18]

Rétt Gísli, ég bý nú í 112 en hef um lengri eða skemmri tíma búið í öllum þessum póstnúmerum sem ég taldi upp. Hefði kannski getað orðað það skýrar. Skrapp reyndar norður á föstudaginn til að sjá leiksýningarnar hjá LA - finnst ég á vissan hátt alltaf vera að koma heim þegar ég kem norður. Það á reyndar líka við um Dalina.

[Gísli Sigurðsson, 27.4.2008 kl. 19:41]

Ég sjálfur er búinn að flakka aðeins um landið, bjó meira að segja í 10 ár í 850,  og 7 ár í 640. Eins og þú þá er ég búinn að fara nokkrum sinnum á leiksýningu á Akureyri. Sá síðast Fló á skinni, alveg tær snilld.

[Tryggvi L. Skjaldarson, 27.4.2008 kl. 20:29]

Það er snúið fyrir þá sem ekki vita betur að taka afstöðu, þegar andstæðum  sjónarmiðum er haldið á lofti af fólki sem telur sig vita betur.