Ódrepandi ferðaþjónusta og kílóverð á hval

Það verður að segjast eins og er að ferðaþjónustan á sannarlega framtíðina fyrir sér. Það hefur hún sýnt svo ekki verður um villst. Hún hefur lifað af hágengis- og þenslustefnu undanfarinna missera og hún hefur eflst þrátt fyrir að ríkisstjórnin eyði meira fé í að auglýsa landið sem gósenland álrisa en sem náttúruparadís.

Síðast en ekki síst hefur ferðaþjónustunni tekist að vaxa á hverju ári þrátt fyrir núverandi og fyrrverandi formenn ferðamálaráðs, þá Einar Odd Kristjánsson og Einar K Guðfinnsson. Það er kannski mesta afrekið. Sá sem á slíka vini...

Whole Foods álítur orðspor Íslendinga orðið svo slæmt í umhverfismálum að verslunarkeðjan telur það hvorki sér né íslenskum vörum til framdráttar að auglýsa þær sem íslenskar. Orðin Iceland Naturally eru að verða alþjóðleg öfugmæli, þökk sé vanhugsuðum aðgerðum sjávarútvegsráðherra.

Í síðustu viku voru fréttir af því að íslensk stjórnvöld borga sérstöku ráðgjafafyrirtæki í Bandaríkjunum milljón á mánuði fyrir hagsmunagæslu. Einkum til að vega upp á móti óæskilegum áhrifum af ákvörðunum sjávarútvegsráðherra í hvalveiðum og andstöðu hans við tillögur alþjóðasamfélagsins um tímabundið bann við botnvörpuveiðum á alþjóðlegu hafsvæði utan lögsögu þjóðríkja. Sjálfsagt ekki vanþörf á þeim peningum.

Það er þörf á meiri peningum. Einar Oddur Kristjánsson, taldi sem formaður ferðamálaráðs í nóvember að 300 milljónir þyrfti í aukið fé til markaðsmála til að mæta óæskilegum áhrifum af hvalveiðum Íslendinga á ferðaþjónustuna. Sem varaformaður fjárlaganefndar virðist hann hins vegar ekki hafa sömu áhyggjur því niðurstaða fjárlaga varð ekki aukning á fé til markaðsmála heldur samdráttur. Traustur málsvari ferðaþjónustunnar, Einar Oddur.

Nú er í uppsiglingu herferð umhverfisverndarsamtaka vegna vanhugsaðrar og einstrengingslegrar ákvörðunar sjávarútvegsráðherra um að hefja tilgangslausar hvalveiðar í atvinnuskini. Án alls undirbúnings, án þess að vita hvort markaður væri fyrir afurðirnar og án þess að hafa minnsta samráð við ferðaþjónustuna.

Það verður dýrt kílóverðið á hvalkjötinu þegar upp er staðið. Enn er óvíst að hægt verði að selja kjötið til Japans en eins og kunnugt er taldi Japanski sendiherrann útilokað að Japanir hefðu áhuga á að flytja inn frá Íslandi eitthvað sem meira en nóg væri til af í Japan. Við vitum þó hver verður látin borga reikninginn á endanum - hin ódrepandi ferðaþjónusta!

Segir herferð gegn íslenskum vörum í undirbúningi í Bandaríkunum

Athugasemdir

[Sigurður Ari (IP-tala skráð) 27.12.2006 kl. 11:12]

Kemur alltaf betur og betur í ljós hversu illa ígrunduð ákvörðun þetta var hjá Herra Sjávarútvegisráðherra. En annað mál er að áróður umhverfisverndarsinna er einnig botnlaus pyttur sem varla er mark á takandi. Tölur um "hvalkjötsfjöll" í Japan eru teknar úr öllu samhengi og markaðurinn, en ekki sendiherra Japans, fær að eiga lokaorðið um hvort af Japanssölu verður...

[Agnar (IP-tala skráð) 27.12.2006 kl. 21:04]

Tveir þumlar

[Herbert Guðmundsson, 27.12.2006 kl. 22:33]

Er ekki einhver með þrjá þumla? Ekki veitir af til þess að dýrka þessa dómadags dellu þína um íslenska ferðaþjónustu versus hvalveiðar.

[Baldur McQueen Rafnsson (IP-tala skráð) 27.12.2006 kl. 23:27]

Samkvæmt fréttum dagsins, er ekki hægt að kenna hvalveiðum um slaka á bandarískum markaði.  Sjávarútvegsráðherra metur það svo, að um lélegt afurðaverð sé að ræða.

Hér má sjá tilvitnanir í þrjá stóra markaðsaðila sem allir virðast sammála um eitt.  Hvergi fæst betra afurðaverð en einmitt í Bandaríkjunum.