Vertu ekki að plata mig

Jæja, þá er gríman fallin. Úr því ekki gengur að múta Hafnfirðingum þá dugar ekki annað en að hóta þeim.

Einhvern veginn finnst manni það nú bara heiðarlegast af þeim. Svona meira í stíl við karakter fyrirtækis sem rekur fyrirvaralaust fullorðna starfsmenn eftir áratuga þjónustu. Fer þeim betur en gjafir og blíðmælgi.

Skoðum aðeins hvað stendur á bak við hótun Alcan.

4. mars í fyrra sagði Hrannar Pétursson, upplýsingafulltrúi Alcan í fréttum á Rúv: "Ja eins og aðrir sem að stunda mjög tæknilegan rekstur að þá þurfum við auðvitað stöðugt að vinna að endurbótum á okkar verksmiðju. Og í sjálfu sér tæki það fyrirtækið ekki langan tíma að verða úrelt ef að slík vinna væri lögð til hliðar, hugsanlega í áratug eða svo. Við erum ekkert frábrugðin öðrum nútímalegum fyrirtækjum hvað það varðar."

Hér fyrir ofan er Hrannar Pétursson að tala um að EF öll tækniþróun yrði lögð niður þá myndi fyrirtækið úreldast á 10-15 árum. Í Fréttablaðinu í dag segir hann: "Það getur vel farið svo að álverinu verði lokað ef það verður ekki stækkað. Við viljum tryggja samkeppnishæfni þess til lengri tíma á alþjóðlegum markaði, þannig að álverið geti verið hér í að minnsta kosti 40 ár í viðbót."

Auðvitað verða fyrirtæki óhagkvæm sem ekki fylgja tækniþróuninni eftir. En treystir Alcan sér til að segja afdráttarlaust að stækkun sé algjör forsenda þess að það sé hægt? Treystir Alcan sér til að segja að það sé þýðingarlaust að stunda eðlilega tækniþróun nema fyrirtækið fái leyfi til að tæpleg þrefalda sig að stærð?

Það væri gaman að fá svar frá Hrannari Péturssyni um það.  

EF það er niðurstaðan þá geta Hafnfirðingar velt þessu fyrir sér: Hvort vil ég heldur hafa álverið í Straumsvík eins og það er núna í 10-15 ár í viðbót og halda áfram með þróun bæjarlandsins eða hafa þrisvar sinnum stærra álver í bakgarði bæjarins í "að minnsta kosti" 40 ár í viðbót? Til  2047?

Ég held að það þurfi ekki að taka hótanir Alcan of hátíðlega, þetta er bara næsta ráð í bókinni til að fá fram JÁ við stækkun með góðu eða illu.

"Vertu ekki að plata mig, þú ert bara að nota mig" svo vitnað sé í klassíkina.

Athugasemdir

[Svavar Friðriksson (IP-tala skráð) 5.1.2007 kl. 16:27]

Þetta er nú ekki flókið, þótt það sé kostnaðarsamt.  Auðvitað á að flytja álverið í burtu þar sem nægt pláss er og verður.  Ekki myndi ég vilja hafa mengandi fyrirtæki hinum megin við götuna og allt tal um að tvöfalda álverið á þessum stað er stórkostleg tímaskekkja. 

[Ólafur Sveinbjörnsson (IP-tala skráð) 5.1.2007 kl. 19:27]

Flottir pistlar hjá þér, ég er einn af þeim sem var látinn fara frá Ísal. Einn af þeim fyrstu, búin að leggja mitt til fyrirtækisins og var útvegaður verksamningur en þá kemur Ristinn eins og hún var/er kölluð og ég fekk að taka pokann minn þegar samningutin var búin. Einhver skrifaði að Rannveig Rist væri strengjabrúða hjá ALCAN en það tel ég ekki. vera Hún er bara svona illa innréttuð, fólk er bara að sjá toppinn á ísjakanum á hennar samviskuleysi. Hrannar blaðafulltrúi er greinilega í góðum félagsskap með henni. Það á ekki að leyfa svona fólki að ganga frá tilveru fólks. Ég veit um eitt tilfelli sem leiddi til sjálfsmorðs. Ég trúi því ekki að Hafnfirðingar leyfi þessu krabbameini að stækka. Ég segi NEI.

[Jóhanna Fríða Dalkvist, 6.1.2007 kl. 12:11]

Það er búið að skipuleggja iðnaðarsvæði á svæðinu næst Straumsvík, ætlið þið líka að flytja það?

Viljið þið frekar hafa mörg hundruð lítil iðnaðarfyrirtæki sem ekkert er fylgst með í sambandi við mengun, heldur en eitt stórt sem stöðugt er fylgst með úr öllum hugsanlegum áttum?

Auðvitað þarf Alcan að stækka til að það verði arðbært fyrir eigendur þess að starfrækja það, hafið þið ekkert fylgst með undanfarið?

Það er hvergi verið að framleiða ál á umhverfisvænni hátt heldur en hér, eigum við þá bara að menga annars staðar, eru þið að segja að það sé allt í lagi, eða eigum við að hætta að framleiða ál, það segji ég að sé hræsni. Notið þið annars ekki flugvélar? Notið þið álpotta? Er maturinn ykkar þá ekki eitraður?

Hótanir eru ekki það sama og staðreyndir, ekki rugla því saman, fólk á rétt á að fá að vita þetta til að vita um hvað það er að fjalla ef kannski einhverjum öðrum langaði til að fjalla um þetta á málefnilegri hátt en þið eruð að gera hér.

Rannveig er ekki strengjabrúða, en hún er heldur ekki einráð, þetta er hennar starf og hún sinnir því vel. 

En bara mín skoðun...hvað veit ég...og hvað ætli svo sem þið vitið...

[Hafnfirðingur (IP-tala skráð) 7.1.2007 kl. 12:22]

Starfsmönnum Norðurljósa var sagt að ef fjölmiðlafrumvarpið yrði að lögum þá misstu þeir vinnuna. Þeim var því ráðlagt að beita öllu sínu afli gegn frumvarpinu sem þeir svo gerðu. Hvað var það annað en hótun? Kannski ekki sama hver hótar?