Að virkja orku sem er ekki til með peningum sem eru ekki til!

Það er verulega áhugavert að glugga í ársskýrslu Hitaveitu Suðurnesja 2007. Ekki aðeins af því þar segir hreint út að allt þurfi að ganga upp ef það á að nást að afhenda orku fyrir 1. áfanga Helguvíkurálvers í tæka tíð. Ekki heldur af því þar segir að ekki verði hægt að verða við óskum margra fyrirtækja sem hafa óskað eftir 10-50 MW fyrir starfsemi sína.

Ársskýrslan er hins vegar einstaklega áhugaverð þegar maður hugleiðir hvernig þetta fyrirtæki ætlar að fjármagna hinar gríðarlegu framkvæmdir sem nú er stefnt að (og mun útheimta alvirkjun SV horns landsins). Lítum á nokkrar tölur.

Eigið fé í ársbyrjun 2007 voru tæpir 20 ma
Skuldir í ársbyrjun 2007 voru tæpir 17 ma

Rekstrartekjur ársins 2006 voru 6,5 ma
Framleiðslukostnaður (rekstrargjöld) voru 4,2 ma
Vergur hagnaður ársins 2006 var rúmlega 2,3 ma

Vaxtagjöld ársins 2006 voru um 0,5 ma
Innlendar skuldir í ársbyrjun 2007 voru 1,5 ma
Erlendar skuldir í ársbyrjun 2007 voru um 12 ma

Í ársskýrslunni er áætlað að afborgun langtímalána á árinu 2009 muni verða um 0,9 ma
Erlendar skuldir fyrirtækisins hafa hækkað um tæp 100% - úr 12 ma í 24 ma.

Næmnigreining gerir ráð fyrir því að ef allar aðrar breytur haldist stöðugar - sérstaklega vextir - muni 10% lækkun gengis krónunar þýða um 0,8 ma tekjutap eftir skatta. Tekjur munu því rýrna um 7-8 ma miðað við gengið eins og það er nú. Óvíst er hvaða áhrif vaxtahækkun mun hafa.

Næmnigreining gerir ráð fyrir að 10% lækkun álverðs rýri tekur eftir skatta um 241 milljón króna. Reiknað með 40% lækkun álverðs er það lækkun tekna um tæpan milljarð króna.

Nú bætist við að búið er að skipta HS upp í HS orku og HS veitur. HS orka yfirtekur erlendu skuldirnar og nýtur ekki tekna af vatns- og raforkusölu til almennings. Þar fer feitur biti.

Mér segir svo hugur að HS orka eigi afar langt í land með að fjármagna virkjunarframkvæmdir sínar fyrir álver í Helguvík. Er ekki rétt að fara að horfast í augu við það að lítil orkufyrirtæki hafa farið of geyst ekki síður en ýmsir aðrir aðilar?

Væri ekki hyggilegra að líta til nokkurra smærri viðskiptavina en orkufrekjunnar í Helguvík sem hvorki eru til orkuauðlindir til að seðja né heldur til fjármagn til að virkja fyrir?

Framkvæmdastjóri HS segir að 2x50 MW eigi að fá úr stækkun Reykjanesvirkjunar. Það er hins vegar álit Orkustofnunar að svæðið beri ekki frekari hrávarmanýtingu.

Stefna HS virðist vera að virkja orku sem er ekki til og nota til þess peninga sem ekki heldur eru til.

Græna netið með efasemdir um Helguvíkursamning

Athugasemdir

[Óðinn Þórisson, 5.1.2009 kl. 19:44]

"Össur Skarphéðinsson iðnaðarráðherra hefur ákveðið að fjárfestingasamningur vegna allt að 260 þúsund tonna álvers í Helguvík verði staðfestur"

Össur á hrós skilið

[Sævar Helgason, 5.1.2009 kl. 19:57]

Það virðist sem að þarna sé verið að koma á koppinn einhverskonar atvinnubótafyrirtæki fyrir Suðurnesjamenn og áherslan fyrst og fremst á atvinnumál næstu 3 árin - við virkjanir á Hellisheiði og við álverið sjálft. Orkuverðið  eru þessi gömlu 17 mills á kw st.  - verð sem hefur verið gegnum gangandi í áratugi.  

Heildarpakkinn liggur ekki fyrir hvað raforkuöflun snertir- væntanlega verður Þjórsáin öll tekin innan 3- 4 ára...  og Bitra ? 

Það eru slæmir tímar - efnahagshrun af gáleysi og atvinnubótaframkvæmdir með afslætti...

[Gunnlaugur Ingvarsson (IP-tala skráð) 5.1.2009 kl. 20:22]

Já Dofri minn, ykkur er vorkunn sem eruð í þessum flokki tækifærismennskunnar og flokki pukurs,  leyndar og spillingar. Tala nú ekki um yfirlætið og allan hrokann og lygina sem formaður ykkar hefur borið á borð fyrir þjóðina. 

Öll kosningloforð Samfylkingarinnar hafa verið kolsvikinn auk þess sem flokkurinn stóð fyrir með aðgerðarleysi sínu og meðvirkni að því efnahagslíf þjóðarinnar er nú í kalda koli !

Eftir efnahagshrunið hafa allar aðgerðir og viðbrögð Flokksforystunnar verið fum og fát og leynd og pukur.  

[Egill Jón Kristjánsson (IP-tala skráð) 5.1.2009 kl. 23:24]

Þú og þínir líkir eru farnir að minna á öfgatrúarflokk frekar en afl til framdrátta  íslensku þjóðinni. Þið deilið harðlega á samning sem þið fáið ekki að sjá og tekst engu að síður að nota hann til útreikninga. Það er alveg sama hversu góður samningur verður gerður. Öfgatrúarmenn verða alltaf samir við sig. Hvað skildu mörg börn og margar fjölskyldur hafa lífsviðurværi sitt af tekjum frá álverum? Hvernig skildi ástandið vera á Íslandi ef við tökum álverin út fyrir sviga efnahagslífsins.? Ég sé að þú ert svo sleipur í reikningi að þú ættir að glíma við þessa stærðfræði. Ég verð að segja eins og er að ég er kominn með upp í háls af frelsurum og vitringum eins og þér Dofri.

[Dofri Hermannsson, 6.1.2009 kl. 00:24]

Egill. Aðeins eitt ráð við þessu síðasta - lestu bara það sem þú ert sammála!

[Jón Erlingur Jónsson (IP-tala skráð) 6.1.2009 kl. 00:34]

Takk fyrir þessar upplýsingar Dofri. Mér lýst vægast sagt illa á þessa framkvæmd. Orkusölusamningur OR (ef rétt er að samið sé um 17 mills/kwst) er einnig slæm fyrir íbúa Reykjavíkur og alger tímaskekkja. Sömuleiðis þessi skattaafsláttarpakki sem á að veita sem engin önnur fyrirtæki fá. Það væri eftir öðru ef Landsbankinn sem hefur milligöngu um lánin til verksmiðjunnar taki á sig skuldbindingar án þess að fá nokkuð í staðinn, leggi til ríkisstuðning í einhverju formi m.ö.o. Mér segir svo hugur að það þurfi að fylgjast vel með því að þessi ríkisbanki hendi ekki eigin fé sínu í þetta líka.