Kvenfyrirlitning Geirs H Haarde

Mér finnst alveg frábært að Geir H Haarde skuli loks hafa komið í leitirnar en lýst var eftir honum í Spaugstofunni á laugardaginn var. Það varð hins vegar deginum ljósara af hverju Geir hefur verið haldið í skugganum - honum er einkar lagið að stíga í alla drullupolla sem á vegi hans verða.

Það sem aftur á móti er ekki skemmtilegt, jafnvel ekki þótt maður sé mótherji hans í pólitík, er hin klúra kvenfyrirlitning sem aftur og aftur skýtur upp kollinum hjá formanni Sjálfstæðisflokksins.

Allir muna ummæli hans um að maður geti ekki alltaf farið heim með sætustu stelpuna á ballinu - en það má finna aðra sem gerir sama gagn! Þetta voru klúr orð en margir voru þó til í að fyrirgefa þessum bangsalega kalli að hafa misst upp úr sér misheppnaðan karlpungabrandara.

Ummæli hans í Silfri Egils í gær eru hins vegar ófyrirgefanleg. Þar sagði Geir Haarde orðrétt um konurnar sem urðu barnshafandi eftir misnotkun af hálfu starfsmanna Byrgisins: "Auðvitað er ekki hægt að fullyrða að þessar stúlkur hefðu ekki orðið barnshafandi hvort eð er..."

Hvað er eiginlega að gerast í hugarheimi manns sem talar svona?

Ummælin lýsa ekki bara algjöru virðingarleysi gagnvart skjólstæðingum Byrgisins sem máttu þola kynferðislega misnotkun af hálfu þeirra sem áttu að veita þeim vernd og skjól. Þau lýsa líka algjörri afneitun forsætisráðherrans á ábyrgð stjórnvalda gagnvart þessum konum og börnum þeirra.

Ef nokkur arða af sómatilfinningu er til í þessum karli hlýtur hann að biðja konurnar afsökunar á ummælum sínum. Honum og ríkisstjórninni væri líka sæmst að axla ábyrgð á því að hafa brugðist eftirlitsskyldu sinni í stað þess að benda fingrinum á alla aðra sem ekki höfðu aðgang að trúnaðarupplýsingum. Svona hagar maður sér ekki.

Athugasemdir

[Einar (IP-tala skráð) 12.2.2007 kl. 13:19]

Er það ekki líka kvennfyrirlitning, að skrifa kvnenfyrirlitning með einu 'n' ?

[Einar (IP-tala skráð) 12.2.2007 kl. 13:21]

taka 2: Er það ekki líka kvennfyrirlitning, að skrifa kvennfyrirlitning með einu 'n' ?

[Jón Steinar Ragnarsson, 12.2.2007 kl. 13:23]

Ert þú nú ekki að oftúlka Dofri minn.  Það er alvarlegt mál að bera kvenfyrirlitningu á fólk á svo veikum grunni.  Þetta er bara eðlileg spurning og ekki fullyrðing.  Mér finnst þú vera að gríðpa í málefnalaus hálmstrá hér.  Ég mundi hugleiða í þínum sporum taka mannlegt eðli inn í jöfnuna, þegar þú hugleiðir Byrgissápuna.  Er verið að reyna að gera hið opinbera ábyrgt fyrir undirkomu lausaleikskróa og nýta það sem rök í kosningabaráttu?  Jahérnahér, segi ég nú bara.

[Dofri Hermannsson, 12.2.2007 kl. 14:01]

Þú missir dálítið af aðalmálinu hérna Jón Steinar. Þessar stúlkur eru mjög varnarlausar þegar þær koma inn á meðferðarheimilið og eru þess vegna auðveld bráð fyrir þessum mönnum. Þarna er því um gríðarlega alvarlega misnotkun á trausti að ræða. Þar fyrir utan er Byrgið meðferðarheimili þar sem trúarhiti ríkir og stúlkunum því meinað að fara í fóstureyðingu sem þær hefðu e.t.v. annars gert.

Það er út af þessum sérstöku aðstæðum sem athugasemd forsætisráðherra er með eindæmum ósmekkleg - stúlkurnar voru misnotaðar og urðu ófrískar við það! Að gera lítið úr því er smekklaust og algjörlega ósamboðið forsætisráðherra þjóðarinnar.

Það er rétt, kvenfyrirlitning er stórt orð og kannski á Geir betra skilið. Það er samt undarlegur þankagangur sem elur af sér svona athugasemdir til viðbótar við setningunni um sætustu stelpuna á ballinu og aðrar sem "gera sama gagn".

[Loftur Altice Þorsteinsson (IP-tala skráð) 12.2.2007 kl. 15:27]

Þetta er lágkúruleg umræða, Dofri og ekki sæmandi forustumanni í stjórnmálaflokki. Því miður eru Íslendsk stjórnmál oft með þessu marki brennd. Reynt er að beita skoðanakúgun og yfirgnæfa andstæðinga með innihalds litlum hávaða vaðli. Feministum er sérstaklega tamt að beita svona aðferðum og sumir vinstri-sinnar geta ekki setið á sér. Verja verður rétt manna til að hafa skoðanir, jafnvel þótt þær falli ekki að smekk manns sjálfs.

Dæmi um tilraunir til skoðanakúgunar og heftingar málfrelsis, er nýleg umræða um innflutt fólk. Hvers vegna má ekki ræða um vandamál sem upp kunna að koma í samfélaginu? Er nauðsynlegt að bíða með umræðu um öll mál, þar til þau eru orðin stórkostlegt vandamál? Öll vitum við að múslimar skapa víða vandamál, vegna ofstækisfullra trúarskoðana. Synir Allah hafa háð útþenslu-stríð í 5000 ár, allt frá innrásum þeirra í Súmer. Þetta er auðvitað ekki einstakt fyrir þá, en þeir hafa náð óvenjulega miklum árangri, meðal annars vegna boðunar Múhameðs. Því má bæta við til útskýringar, að Allah (al-ilah) er auðvitað mun eldri en boðskapur Múhameðs.

Hvað varðar ummæli Geirs Haarde og meinta kvennfyrirlitningu hans, er ljóst að þú slærð vindhögg með svona málflutningi. Þótt ég sé orðinn latur við að sækja fundi, vildi svo til að ég var á fundinum sem þú vísar til og tók vel eftir orðum Geirs:

"maður getur ekki alltaf farið heim með sætustu stelpuna á ballinu - en það má finna aðra sem gerir sama gagn"

Þessum orðum var hnýtt við sönn ummæli um samninga. Þegar setzt er að samningum, er ekki hægt að gera ráð fyrir að maður nái fram öllum sínum óskum. Eiginkona Geirs sat á fremsta bekk og hann leyfði sér að segja brandara á hennar kostnað og þannig undirstrika þær staðreyndir samninga, sem hann hafði verið að fjalla um. Allir sem hafa reynslu af mannlegum samskiptum vita, að Geir var að tjá djúp sannindi. Hin ummælin sem þú hefur eftir Geir, eru svipaðs eðlis.

Einhverjir munu segja að málatilbúnaður þinn sé merki um málefna-þurrð Samfylkingarinnar. Ég er ekki svo fordómafullur. Þú hefur fullan rétt, að beita þeim umvöndunum sem þú telur viðeigandi, á sama hátt og ég er að gefa þér ábendingar, með mínum skrifum. Hins vegar er það hvorki þér né Samfylkingunni til framdráttar að fara inn á þessa braut. Raunveruleg viðfangsefni í Íslendskum stjórnmálum eru ærin.                                               >> Með vinsamlegri kveðju. <<

[Egill Rúnar Sigurðsson, 12.2.2007 kl. 17:04]

Hjartanlega sammála þér Dofri.  Einkar ósmeklegt af forsætisráðherra að láta þetta út úr sér.  Ekkert annað en kvennfyrirlitning!

[Kútur (IP-tala skráð) 12.2.2007 kl. 20:23]

Þess má geta að orðið kvenfyrirlitning er stafað rétt af bloggara.  Það er ekki með tveimur n-um heldur einu, rétt eins og önnur samsett orð af sama stofni, s.s. kvenleg og kvensamur.

[Loftur Altice Þorsteinsson (IP-tala skráð) 13.2.2007 kl. 10:45]

Þar fengum við að heyra gelt í tveimur pólitískum varðhundum. Þetta er meðal annars það sem ég var að vísa til. Reynt er að yfirgnæfa vitræna umræðu með slagorðum, eða óhróðri. Þetta er ekki rökræða, heldur fremur tilraun til skoðanakúgunar.

[Dofri Hermannsson, 13.2.2007 kl. 11:03]

Heyri ég bofs!?

[Óðinn Þórisson (IP-tala skráð) 13.2.2007 kl. 21:35]

Það er alveg greynilegt að kosningabaráttan er að byrja og við treystum á að fólk láti skynsemina ráða í mai og þá þurfum við ekkert að óttast. xd