Velkominn í hópinn!

Mér finnst alveg frábært að Reynir Harðarson í CCP skuli ætla að leggjast á árar með okkur í Samfylkingunni í baráttu fyrir náttúruvernd og nýrri hugsun í atvinnulífinu. Mér finnst ekki síður frábært af hverju hann ætlar að gera það en í stuttri frétt um þetta í Mbl. í dag er haft eftir Reyni:

"Það er margt, nýtt, ungt og flott fólk í flokknum, með ferskar hugmyndir sem ég sé ekki hjá hinum flokkunum og sérstaklega ekki hjá mínum fyrrverandi flokki Sjálfstæðisflokknum." Hann nefnir vilja til að búa ungum fyrirtækjum hagstæðari skilyrði og "sterkari framtíðarsýn, sérstaklega í grænu málunum. Fagra Ísland þarf að ná fram að ganga."

Þarna vísar Reynir í það sem Samfylkingin hefur kallað "Nýja atvinnulífið" sem er eins konar rammi utan um einar 10-12 tillögur Samfylkingarinnar til að bæta vaxtarskilyrði sprotafyrirtækja allt frá hugmyndarstigi til öflugs útrásarfyrirtækis eins og t.d. CCP. Þar á meðal eru m.a. þær þrjár tillögur sem hirtu 1. 2. og 3. verðlaun á Sprotaþingi Samtaka Iðnaðarins um daginn fyrir framan nefið á Sjálfstæðismönnum eins og reyndar Vg, Framsókn og Frjálslyndum.

Reynir talar einnig um sterka framtíðarsýn í grænu málunum og nefnir Fagra Ísland í því sambandi. Þetta eru ekki lítil meðmæli frá einum af helstu forystumönnum Framtíðarlandsins. Hann segir að Fagra Ísland verði að ná fram að ganga og er reiðubúinn að leggja sína krafta á vogarskálarnar til að svo megi verða. Hann sér að í Fagra Íslandi er ekki bara skýr afstaða heldur líka skýrt mótaðar tillögur um það hvernig er hægt að mynda breiða sátt um náttúruvernd.

Það er áhugavert að Reynir telur sinn gamla flokk, Sjálfstæðisflokkinn, ekki lengur búa yfir þeim krafti og fersku hugmyndum sem honum finnst vanta í stjórnmálin. Þetta finnur hann hins vegar hjá Samfylkingunni. Þetta sýnir að hugmyndir Samfylkingarinnar, sem hefur skilgreint sig á miðju stjórnmálanna, eiga fulla samleið með hugmyndum hófsamra hægrimanna.

Í flestum málum er þetta auðvitað fyrst og fremst spurning um heilbrigða skynsemi og á henni byggjast tillögur Samfylkingarinnar öðru fremur. Líklega er það svo með heilbrigða skynsemi, líkt og sagt hefur verið um peningana, hún safnast þangað sem hún er fyrir. Velkominn í hópinn Reynir!

Athugasemdir

[Sævar Helgason, Hafnarfirði (IP-tala skráð) 21.2.2007 kl. 11:04]

" Þungaviktarmaður " hátæknigeirans og stjórnarmaður í Framtíðarlandinu genginn til liðs við Samfylkinguna, Reynir Harðarson.

Enginn smá liðsauki við hina nýju atvinnustefnu Samfylkingarinnar "Nýja atvinnulífið " Og einnig  sterk stoð við Fagra Ísland.

Það er bjart yfir skýrri framtíðasýn Samfylkingarinnar. Tiltrú á að Samfylkingin og afarvel unnin og ígrunduð stefna hennar í þjóðmálum eigi erindi, fer ört vaxandi

Allt ber þetta að sama brunni, Samfylkingin er á hraðri leið að verða forystuafl og leiðandi í íslenskum stjórnmálum ...áfram með baráttuna  ekki minna en stórsigur í vor.

[Sævar Helgason (IP-tala skráð) 21.2.2007 kl. 21:20]

Gott innlegg frá Gísla Kr.

Svona til gamans og íhugunar varðandi sprotafyrirtæki.

Í upphafi var "Bónus" einskonar sprotafyrirtæki þó það hefði ekki fengið neinn stuðning frá hinu opinbera .Þeir feðgar áttu 1 milljón í upphafi og veðjuðu á nýja og ferska hugmynd sína og fylgdu henni fast eftir...eftirleikinn þekkjum við öll..árangurinn er ævintýralegur og er sennilega ekki nena hálfnaður  eða tæplega það enn.

Sannarlega hvati fyrir aðra. 

[Dofri Hermannsson, 22.2.2007 kl. 01:17]

Gísli minn. Veit ekki hvar þú hefur verið en Sprotaþingið var svo sannarlega ekki haldið af ráðuneytunum eða á þeirra kostnað. Að því stóðu Samtök Iðnaðarins og Samtök Sprotafyrirtækja.

Því miður verð ég að hryggja þig með því að Sjálfstæðismenn hafa ekki sýnt minnsta áhuga á að setja sig inn í þær tillögur sem SI, SSP, samtök upplýsingatæknifyrirtækja og fleiri hafa af miklum metnaði borið á borð fyrir stjórnvöld undanfarin misseri. Það gengur sá brandari innan þessara geira að ástæðan sé sú að fjármálaráðherra er dýralæknir og ekki vanur að þurfa að hlusta á skjólstæðinga sína.

Það sýnir glöggt hvað Sjálfstæðisflokkurinn hefur lítinn skilning á málinu að þeir eru sífellt að leggja til afslátt á sköttum til þessara fyrirtækja. Málið er það að sprotafyrirtæki nota allt sitt fjármagn og meira til í vöxt og því eru engir skattar til að njóta afsláttar af! Þetta ætti ekki að vera flókið að skilja en hefur samt vafist fyrir þínum mönnum í rúm 2 ár.

Ég er síðan alls ekki viss um að þú vitir hvað sprotafyrirtæki er, sem er ekkert skrýtið því það vita alls ekki allir (og afar fáir sjálfstæðismenn að því er virðist;-). Sprotafyrirtæki skilgreina sig sem fyrirtæki sem verja meira en 8% af veltu sinni í R&D svo hér er ekki verið að ræða stofnun á ehf sem líka er mjög gott en bara allt annað mál.

Úr því ég er farinn að skýra út svona lagað er best að ég upplýsi í leiðinni að hátæknifyrirtæki eru þau fyrirtæki sem verja meira en 4% af veltu í R&D en ekki fyrirtæki sem nota há-tæknilegann og flókinn tækjabúnað.

Held að þú ættir, áður en þú kommenterar meira á þessi mál að lesa hátækniskýrslur Samtaka Iðnaðarins, tilboð Samtaka Upplýsingatæknifyrirtækja - þriðja stoðin og tillögurnar sem settar voru fram á Sprotaþinginu. Þú finnur þetta allt á www.si.is

Held svona að lokum að klisjur um að vinstri menn séu á móti fyrirtækjum séu býsna gamaldags. Þetta er ekki spurning um hægri eða vinstri, heldur um heilbrigða skynsemi og e.t.v. hvort ráðandi flokkar séu búnir að vera svo lengi við völd að þeir séu hættir að hlusta.

Kv. Dofri.

[Dofri Hermannsson, 22.2.2007 kl. 13:21]

Sæll Gísli. Ætla nú ekki að fara að þrasa við þig um þetta. Finnst gott að þú ert búinn að fullvissa þig um að stjórnarráðin hafi ekki haldið sprotaþingið en finnst sumt annað skrýtið sem þú segir. T.d. segir þú að ég hafi ekki talað um samlagshlutafélögin, talar svo að því er virðist af þekkingu um þau sjálfur en endar svo á að segja mér að kynna mér allar hliðar málsins áður en ég fer af stað með yfirlýsingar (væntanlega um slhf sem þú varst nýbúinn að segja að ég hefði ekki minnst á!?)

En talandi um að kynna sér alla anga málsins þá get ég upplýst þig um að reynsla Norðmanna af endurgreiðslukerfinu hefur verið mjög góð. Þar er reyndar keyrt saman skattaafsláttarkerfi og endurgreiðslukerfi og þér að segja þá er ekkert sem kemur í veg fyrir það í íslenskum lögum eða samningum okkar t.d. EES samningi að við tökum þetta kerfi upp hér. Á það var bent fyrir meira en ári síðan en hæstvirtur fjármálaráðherra hefur að því er virðist enn ekki skilið þetta.

Þú mátt ekki vera sár þótt ég deili á flokkinn þinn í þessu máli. Hann hefur staðið sig mjög vel á mörgum sviðum, t.d. er ég sammála því að lágir skattar á fyrirtæki, eins og hér eru, er mjög gott fyrir atvinnulífið. Enda munum við ekki breyta því. Hins vegar er flokkurinn þinn orðinn dálítið lúinn og þreyttur, menn eru dálítið farnir að halla sér aftur í stólunum í stað þess að vera á tánum. Tengsl flokksins við atvinnulífið eru orðin rútíneruð og þið farið á mis við nýju raddirnar. Það er bara eðlilegt eftir 16 ára setu í ríkisstjórn og nauðsynlegt fyrir þjóðina að skipta um lið. Þið þurfið hvíld, þið þurfið að endurnýja ykkur, fara aftur út á völlinn og tala við þá sem þið hafið misst tengslin við.

Það er einfaldlega kominn tími til að skipta. No hard feelings

[Óðinn (IP-tala skráð) 22.2.2007 kl. 19:40]

Það verður að vera rík ástæða til að skipta um eins og var með R-listann í Reykjavík. Við skulum rifja upp orð Davíðs Oddsonar þegar ljóst var að endalok R-listans var orðin að veruleika " góður endir á slæmri hugmynd ". Það kom svo fram þegar Vilhjálmur og Björn Ingi fóru að fara yfir málin að skuldastaða borgarinnar var mun verri en þeir hefðu grunað, þannig að því leiti til var nauðsynlegt að Sjálfstæðisflokkurinn tæki við í Reykjavík.
Reynir er mikill styrkur fyrir ykkur, það hefði verið mjög skynsamlegt að setja hann í 4.sætið í Reykjavík, gefa honum öruggt þingsæti, það hefði styrkt flokkinn mikið og möguleikinn á að ná inn 5.mönnum í Reykjavík hefði aukist.

[Dofri Hermannsson, 22.2.2007 kl. 20:01]

Fín skoðanaskipti og greinilegt að þetta hægri/vinstri er á útleið. Ekki síst þegar þú Gísli minn ert farinn að skattyrðast út í Norsku leiðina fyrir það að vera of almenna, eitt gildir fyrir alla, og ert farinn að kalla á miðstýringu

Kv. Dofri