Er biðskylda á Íslandi?

Samfylkingin hefur talað ötullega fyrir málefnum barna og gamals fólks í þessari kosningabaráttu - enda ærið tilefni til.

Ríkisstjórn Sjálfstæðisflokks og Framsóknarflokks hafa misnotað sögulegt tækifæri til að skila góðæri undanfarinna ára til allra hópa samfélagsins, hinir sterkustu hafa verið látnir hafa mest en hinir veikari verið skildir útundan þegar kökunni var skipt. Börn, gamalt fólk og þeir sem eiga við veikindi að stríða.

Biðlistar eru táknræn birtingarmynd þessarar misskiptingar og skorts á samfélagslegri ábyrgð. Hér fyrir neðan gefur að líta nokkra.

Biðlisti barna með geðraskanir
170 börn bíða eftir fyrstu komu á göngudeild BUGL, biðtími allt að eitt og hálft ár. 20-30 mikið veik börn bíða eftir innlögn.

Biðlistar aldraðra
400 bíða í heimahúsum í brýnni þörf fyrir hjúkrunarrými og 900 í þvingaðri samvist með ókunnugum. 62 aldraðir sem lokið hafa meðferð bíða inná Landspítala eftir því að komast í varanleg hjúkrunarrými.

Biðlistar hjartasjúklinga
243 hjartasjúklingar eru á biðlista eftir hjartaþræðingu á LSH, þar af 54 sem hafa beðið lengur en í 3 mánuði. 53 bíða eftir opnum hjartaaðgerðum. 170 til viðbótar bíða eftir öðrum hjartaaðgerðum og -rannsóknum.

Biðlisti barna með þroskafrávik
276 börn með margvísleg þroskafrávik bíða eftir greiningu. Biðtími er allt uppí 3 ár. Greining er skilyrði fyrir því að þessi börn fái stuðning í skólum og aðra þjónustu.

Biðlisti geðfatlaða eftir búsetuúrræðum:
50 geðfatlaðir á Landspítala bíða eftir varanlegri búsetu. Sumir hafa beðið í allt að 15 ár. Auk þess vantar búsetuúrræði fyrir 170 geðfatlaða til viðbótar. Að mati Geðhjálpar eru 60-70 geðfatlaðir á götunni!

Biðlistar eftir liðskiptaaðgerðum
256 sjúklingar bíða eftir liðskiptaaðgerðum á LSH og þar af hafa 138 beðið í meira en 3 mánuði.

Biðlistar eftir sjúkrahúsmeðferð aldraðra
242 aldraðir bíða eftir að komast í margs konar meðferð á öldrunarsviði LSH.

Biðlistar á LSH telja alls 3.145 manns:
Hér að ofan er aðeins sá hluti biðlista eftir aðgerðum á Landspítala sem talinn er verulega slæmur, jafnvel hættulegur, en alls eru á biðlistum þar eftir þjónustu um   3.145 manns. Þar af eru 671 sem bíður eftir augasteinaaðgerð og hafa 453 þeirra beðið lengur en í 3 mánuði.

Biðlistar þroskaheftra
142 þroskaheftir bíða eftir því að komast í skammtímavistun.

Biðlistar öryrkja
200 manns eru á biðlista eftir félagslegu húsnæði hjá Öryrkjabandalaginu.

Biðlistar fatlaðra
100 bíða á biðlistum Svæðisskrifstofa eftir búsetuúrræðum og margir hafa beðið árum saman. Árlega bætast um 15 manns á þann lista.

Biðlistar eftir félagslegu leiguhúsnæði:
Á Stór-Reykjavíkursvæðinu eru 1525 manns á biðlista eftir félagslegu leiguhúsnæði, þar af um 650 námsmenn.

Það er kominn tími til að aflétta biðskyldunni og gera eitthvað í málunum.

Athugasemdir

[Gestur Guðjónsson, 30.4.2007 kl. 08:17]

Samfylkingin ætlar að klára allt þetta.

Það sem hún mun klára fyrst, er ríkiskassinn

[Dofri Hermannsson, 30.4.2007 kl. 10:01]

 

Þakka Jóni Kristófer stuðninginn. Verð hins vegar af gefnu tilefni að leiðrétta hann hvað Húsavík varðar. Það hefur alltaf legið fyrir að skv. Fagra Íslandi verða náttúrusvæði landsins rannsökuð m.t.t. verndargildis og út frá þeirri niðurstöðu verður tekin ákvörðun um verndun og aðra nýtingu - allt eftir verndargildi svæða.

Þetta gildir um Húsavík eins og öll önnur svæði á landinu. Þar er verið að kanna orkumöguleika svæðisins til eflingar atvinnu í héraðinu og hvaða skoðun sem menn kunna að hafa á því er ljóst að þeim rannsóknum verður ekki lokið fyrr en eftir nokkur ár. Þá mun, ef Samfylkingin fær að ráða, verða búið að kanna verndargildi náttúrusvæða og fá svör við því m.a. hvort og hvar orkunýting í Þingeyjasýslu samrýmist verndarsjónarmiðum eða ekki.

Þetta virðist vera dálítið erfitt að skilja fyrir þá sem eru með svo "hreinar línur" að þeir eru bara annað hvort með eða á móti og helst bara á móti. Það hefur þó ekki alltaf verið svo en þessa frétt mátti (þangað til nýlega að fréttin var tekin út) sjá á heimasíðu Orkuveitu Húsavíkur eftir vinnustaðaheimsókn Steingríms J Sigfússonar þangað 16. apríl 2003:

Þá lýsti Steingrímur J. Sigfússon yfir eindregnum stuðningi við það að nýta jarðhitasvæðin í nágrenninu fyrir orkufrekan iðnað á Húsavík og nafngreindi hann sérstakalega Þeistareyki og jarðhitasvæðin í Mývatnssveit.

Þetta kemur mörgum á óvart sem hafa fyrst og fremst ljáð Vg og SJS eyra síðustu misseri því sannarlega hefur ekki heyrst frá honum hálft orð í þessa veru. Þangað til í síðustu viku á Bylgjunni en þá hélt ég hreinlega að ég væri að misheyra eitthvað því þá heyrði ég leiðtogann græna tala um að auðvitað þyrfti ekki að stoppa rannsóknir á virkjanlegri orku og að auðvitað væri enginn að tala um að ekki mætti virkja neitt í framtíðinni, það væri sjálfsagt mál en fyrst þyrfti bara að stoppa í nokkur ár til að kortleggja náttúruna. 

Þarna var SJS sem sagt kominn á Fagra Ísland línuna. Sem hlaut á endanum að verða niðurstaðan af því hann er skynsamur maður og sér að það er eina raunhæfa verklagið við að ná sátt um verndun verðmætra náttúrusvæða á Íslandi. Að staldra við, rannsaka landið allt m.t.t. verndargildis, taka verðmæt svæði frá og ræða svo um hvernig við viljum skipuleggja afganginn.

SJS og Vg eru ekki ein um þessa afstöðubreytingu, þessa hugsun hefur Ómar og Íslandshreyfingin líka tekið upp sem grundvallarsjónarmið og það er vel. Það mega allir sem vilja eiga með okkur hlut í Fagra Íslandi.

[Sævar Helgason (IP-tala skráð) 30.4.2007 kl. 11:07]

Það er aumkunnarvert að verða vitni að þeirri gríðarlegu bælingu sem Sjallarnir eru handnir eftir þann ofuraga  sem fyrrum formaður þeirra, Davíð Oddson, beitti þá um langt árabil. Skýrasta birtingarmyndin eru skrifin hans/hennar Dharma (u) Ennþá eftir eftir þau ár sem liðin eru frá formannaskiptum hjá Sjöllum...brestur þennan skriffinn allan kjark til að koma fram sem frjáls mannpersóna og tjá sig undir eigin nafni.

Hann liggur í " skotgröfum" hulinn öðrum með nafnleynd og úðar yfir menn og málefni

Auðvitað er þetta mikill álitshnekkir fyrir Sjallana , þeim til vorkunar og minnkunar.

[Sævar Helgason (IP-tala skráð) 30.4.2007 kl. 12:22]

Þeir sem skrifa nafnlaust eiga að sjálfsögðu engan rétt á að þeim sé svarað.

Það er nú ekki flóknara en það. Þetta er réttlaust lið með öllu.