Kælivísur

Undanfarið hefur mikið verið rætt um ástandið í miðbænum sem vekur borgarstjóranum jafnvel ugg í brjósti um hábjartan dag. Það eru þá fyrst og fremst hinir ölþyrstu útigangsmenn sem vekja borgarstjóranum ótta og því hefur hann gripið til ýmissa ráðstafana. Þessar ráðstafanir hafa síðan verið mikið ræddar af ótrúlegustu aðilum og sýnist sitt hverjum.

Eitt sjónarhorn á þetta alvarlega mál hefur þó tilfinnanlega vantað í umræðuna og það er hverjum augum útigangsfólkið sjálft lítur þær aðgerðir sem gripið hefur verið til. Hér er gerð tilraun til að bæta úr því.

Þegar bjór ég þamba vil
í því ég mikið pæli
hvort varan skyldi vera til
volg eða beint úr kæli.

ÁTVR einlægt ég
ákaflega hæli.
Þar fást ölin yndisleg
ísköld beint úr kæli.

Herðir Bakkus hald á mér
og hefur mig að þræli.
Háður víst ég orðinn er
öli beint úr kæli.

Eina von mín víst er sú
að Villi burtu fæli
fíkn mína og fari nú
að fjarlægja þennan kæli.

Öls í vímu er ég víst
enn og von ég skæli.
Vínþörfina vantar síst
þótt vanti þennan kæli.

Villi hann er vinur minn
og von að breitt ég smæli.
Hann endurreisa ætlar sinn
ÁTVR kæli.

Athugasemdir

[Geir Ágústsson, 24.8.2007 kl. 11:43]

Keisarinn og Kaffi Aust,

kvalið var úr bænum.

Sötri róna sigað laust,

á siðmenntaðan Völlinn.

[Billi bilaði, 24.8.2007 kl. 17:03]

Takk fyrir flottar vísur.

[Árni Gunnarsson, 25.8.2007 kl. 09:49]

Harkaðu af þér heillin mín

og hættu þessu væli.

fáð´ér bjór og freyðivín

og farðu svo á hæli!

[Anna Einarsdóttir, 25.8.2007 kl. 12:20]

Eigra ég um Austurstræti

og bjórinn mér í næli

Ekki verð með mikil læti

ef mjöðinn fæ úr kæli