Skóflustungublekkingar og "hálfver" í Helguvík

Hvað ætli bæjarstjórinn í Reykjanesbæ sé oft búinn að tilkynna um fyrstu skóflustunguna að Helguvíkurálveri? Líklega hefur hann oftar boðað komu álversins en Gunnar í Krossinum hefur boðað að syndaflóð væri í nánd.

Þetta er sýndarmennska. Þegar bæjarstjórinn segir að búið sé að tryggja orku til fyrsta áfanga álvers í Helguvík fer hann einfaldlega með rangt mál. Rétt eins og með aðra sjálfstæðismenn þessa dagana er erfitt að gera upp við sig hvort það er með vilja gert eða hvort hann hefur bara "lent í þessu". 

Staðreyndin er sú að fyrir utan þau 100 MW sem OR lofaði á sínum tíma getur Hitaveita Suðurnesja ekki ábyrgst nema afar lítinn hluta af því sem þarf til þess að byggja "hálfver" í Helguvík - hvað þá álver í fullri stærð. Þótt næg orka væri til að byggja "hálfver" væri fullkomið ábyrgðarleysi að fara af stað án þess að hafa tryggt orku til alls þess sem stefnt er að.

Ekki mun Landsvirkjun koma til bjargar og þá er eina von bæjarstjórans að OR virki Hengilinn allan og selji nánast hvert einasta megawatt til álbræðslu í Helguvík. Ég held að það sé tímabært að blaðamenn spyrji Ólaf F Magnússon hvað honum finnst um það.

Hitaveita Suðurnesja á von um orku á Krýsuvíkursvæðinu en tilraunaborholur hafa valdið vonbrigðum. Til að auka enn á angur bæjarstjórans í Reykjanesbæ hafa sveitarfélögin Vogar, Grindavík og Hafnarfjörður sem eiga auðlindirnar stofnað um þær félag, Suðurlindir, og vilja að orkan sem þar fæst verði nýtt innan sveitarfélaganna. Ef orkan er þá yfir höfuð virkjanleg og leyfi fæst til að virkja hana sem er langt því frá gefið.

Þó svo færi að OR eða Suðurlindir sæju Helguvík fyrir orku þá væri enn eftir að leggja rafmagnið út í Helguvík, a.m.k. að Fitjum. Enn hefur ekki nokkur maður bent á það línustæði um Reykjanesskagann sem líklegt er að sátt náist um og ekkert bendir til að slík leið finnist. Reykjanesskaginn er gríðarlega merkilegt og fagurt útivistarsvæði sem ferðaþjónustuaðilar, umhverfisverndar- og útivistarfólk mun ekki láta eyðileggja baráttulaust.

Nú er beðið eftir úrskurði um það hvort meta skuli alla þætti fyrirhugaðra framkvæmda í Helguvík saman, þ.e. línulagnir, orkuöflun, byggingu og rekstur álvers. Öllum er ljóst að það er hið eina rétta. Standist framkvæmdin ekki slíkt mat á hún einfaldlega ekki rétt á sér.

Hin síendurtekna boðun Helguvíkurálvers gegn betri vitund predikaranna er hvimleitt og siðlaust áróðursbragð sem tími er kominn til að hætta. Menn ættu að sníða sér ráðherrakápu úr betra klæði.

Helguvík bíði enn um sinn

Athugasemdir

[Árni Gunnarsson, 16.2.2008 kl. 17:20]

Mér er sagt að eina óanægjan með nýtt skipulag á flugvallarasvæðinu hér sé óljós staðsetning á orkufreku álveri fyrir okkur borgarbúa.

[Tryggvi L. Skjaldarson, 16.2.2008 kl. 22:00]

Kannski er eitthvað af Samfylkingarfólki farið að átta sig á að Fagra Ísland getur verið ávísun á Magra Ísland ef ekki er haldið vel á spilunum.

[Gísli Sigurðsson, 17.2.2008 kl. 00:11]

Dofri, ég spyr þig, hvað á fólkið sem býr á Húsavík og þar í grennd og vill halda áfram að búa þar að gera í framtíðinni? Kvótabraskið er að ganga af fiskvinnslunni dauðri. Þú segir kannski eins og VG fólk, eitthvað annað. En það fylgir bara aldrei með hvað þetta annað er, kannski prjóna sokka og peysur fyrir útlendinga fyrir 500 kall á tímann. Jú alveg rétt, tína fjallagrös.

[Lilja Guðrún Þorvaldsdóttir, 17.2.2008 kl. 00:17]

Er þetta ekki svokölluð "smjörklípuaðferð"   fyrrum forsætisráðherra kallar það svo.    Það hafa verið undarlegar tímasetningar á blaðamannafundum hjá þeim frændum og nöfnum um álver í Helguvík og Eyjagöng að undanförnu.  Það væri gaman ef einhverjir könnuðu þessar tilkynningar nánar og bæru tímasetningar saman við annað sem er að gerast í þjóðfélaginu á sama tíma. Forvitnilegt...

[Lára Hanna Einarsdóttir, 17.2.2008 kl. 10:49]

Þessi æðibunugangur og yfirlýsingagleði Árnanna tveggja í vikunni, Matthiesen og Sigfússonar, er fullkomlega innistæðulaus. Þeir eru að beita þrýstingi til að geta sagt að ekki verði aftur snúið - sem er alrangt. Það vantar gríðarlega mikið upp á að hægt sé að hefja framkvæmdir við eitt eða neitt í Helguvík. Árnarnir halda að fólk viti það ekki og haga sér því af fullkomnu ábyrgðarleysi.

Þetta er alvarlegt mál og það má ekki láta þá komast upp með að blekkja fólk á þennan hátt.

[Gísli Baldvinsson (IP-tala skráð) 17.2.2008 kl. 14:22]

Takk fyrir skýran pistil Dofri. Stefnan er skýr. Álver á Bakka er hugmynd sem þessi ríkisstjórn upplifir ekki. Það er langt í Bakka og margt eftir að ákveða. Hálfverið í Helguvík er og verður hálfver. Fræðilega fær það hálfver einungis hálfa orku að mesta lagi. Þar með er það ekki hagkvæmt.

Fagra Ísland útilokar ekki stóriðju sem grænan kost. Lesa betur þeir sem hafa verið að vitna í það plagg.

[Lára Hanna Einarsdóttir, 17.2.2008 kl. 14:25]

Hvað ætli álverssinnum finnist um þessi ósköp...

[Árni Gunnarsson, 17.2.2008 kl. 16:00]

Sammála Láru Hönnu um innistæðulausar yfirlýsingar.

Stærsta pólitíska mál samtímans á Íslandi er hinsvegar alger uppstokkun í sjávarútvegi og hlutlaus líffræðileg úttekt á ráðgjöf Hafró um langt árabil. 

[Örvar Þór Kristjánsson, 17.2.2008 kl. 18:40]

Ætla rétt að vona að Álverið rísi hér sem fyrst, eins og yfirgnæfandi meirihluti íbúa svæðisins eru mér sammála um.  Þakka einnig fyrir það að Samfylkingarmenn hér á svæðinu eru ekki jafn öfgafullir náttúruverndarsinnar og þú Dofri.  Hef aldrei skilið af hverju þú ert ekki í VG.

Annars er það ekkert annað en jákvætt fyrir sveitarfélögin hér fyrir sunnan að fá Álverið.  Við suðurnesjamenn hljótum að sýna sterka samstöðu og koma þessu máli í gegn!  "Náttúruperlur" á Reykjanesi verða ekki fyrir skaða og satt best að segja þá vill fólk frekar fórna einhverjum hraunbreiðum og mosa fyrir hagsæld og atvinnuöryggi.

Árni Sigfússon á hrós skilið fyrir kraft sinn í þessu máli, nú er bara að koma þessu í gegn. 

[Sævar Helgason, 17.2.2008 kl. 22:25]

En Örvar !

Er það ekki Birtuvirkjun á Hellisheiði sem á að útvega raforkuna ?

Og fórna Ölkelduhálsi ? 

Ykkur er væntanlega nákvæmlega sama um það ? 

[Örvar Þór Kristjánsson, 18.2.2008 kl. 11:56]

Orkusamningar vegna álversins liggja fyrir við Hitaveitu Suðurnesja og Orkuveitu Reykjavíkur og því hægt að hefjast handa við fyrsta áfanga.  Síðar mun svo koma í ljós hvenær hægt verður að fara í annan áfanga framkvæmdarinnar, að mér skilst er verið að skoða ýmsa möguleika varðandi orkumál.  Annars er það mitt mat að stundum þurfa menn að fórna og nýta auðlindir náttúrunnar.  Í þessu tilfelli finnst mér meiri hagsmunir teknir fram fyrir minni. 

Orkan sem á að leiða um þessar raflínur hér fyrir sunnan hefur miklu meira notagildi en bara fyrir álverið í Helguvík, það mun því verða virkjað í framtíðinni hvort svo sem sú orka fer í Álver eða ekki. Þetta er spurning um lífæð fyrir atvinnulífið í þessum landshluta.  Vinstri öfgamenn eru svo "skarpir" að þeir sjá lausn í netþjónabúum sem krefjast mikillar orku, virkjana og línulagna en leggjast svo gegn því þegar um Álver er að ræða.  Þeim er sem sagt slétt sama um þá mengun sem umhverfissinnar sjá við virkjanir, raflínur og annað svo lengi sem það tengist ekki Álverum.

[Úrsúla Jünemann, 18.2.2008 kl. 13:03]

Mér finnst í hæsta lagi ábyrgðalaust að plana álver í Helguvík og vita nákvæmlega ekkert um hvaða orkan á að koma. Að vita ekki hvar hægt er að leggja háspennulínur svo þær valda ekki sjónmengun. Að vera ekki búin að tryggja sér mengunarkvóta. Að plana hálft álver er nú bara ljótur brandari. Eða ætla menn að leika sama leikinn eins og fyrir austan? Að brölta bara af stað og rökstyðja svo að fyrst það er byrjað á þessu þá yrði að halda áfram, alveg sama hvað það kostar. Skítt með fallegt landslag, sama um eyðileggingu þeirra svæða sem eru dyrmæt  svæði og fyrir ferðamennsku og útivist.

[Ingólfur, 18.2.2008 kl. 14:56]

Örvar, það er ekki annað að heyra á orðum þínum en að allt sé í kaldakoli á Suðurnesjum, hálfur Reykjanesbær á bótum síðan herinn fór og fólksflótti frá svæðinu. Engin uppbygging, engin atvinnusköpun og bráðnauðsynlegt að henda handritunum á eldinn til þess að deyja ekki úr kulda.

Er þetta virkilega svona þarna? 

[Dofri Hermannsson, 18.2.2008 kl. 15:02]

Örvar. 1. áfangi upp á 150 þúsund tonn krefst orku sem svarar 260 MW. OR hefur lofað 100 MW en HS getur aðeins ábyrgst 50-80 MW þar sem ekki er búið að fara með stækkun Reykjanesvirkjunar og Svartsengis í gegnum mat á umhverfisáhrifum. Krýsuvíkursvæðið er álíka langt frá Árna Sigfússyni og gullpotturinn undir regnboganum.

Á næstu 10 árum er búist við að um 2000 störf skapist í kringum starfsemi flugvallarins. Mikil uppbygging er væntanlega á herstöðvarsvæðinu í kring um sérfræðimenntun, rannsóknarstarfsemi og fjölbreyttan iðnað. Suðurnesjamenn ættu því ekki að þurfa að svelta með hendur í skauti - nema þeir sem einblína á álver og skilja ekki bjargráðin nema þau heiti stóriðja.

Eftir því sem umferð um Leifsstöð eykst verður Reykjanesskaginn (sem ég efast um að þú hafir skoðað almennilega) verðmætari fyrir ferðaþjónustuaðila sem munu bjóða millilandafarþegum upp á stuttar ferðir um einstakar náttúruperlur. Að leggja háspennulínur í álver sem engin þörf er á um þessi svæði væru því mikil mistök.

[Gísli (IP-tala skráð) 19.2.2008 kl. 10:14]

Enn og aftur misskilningur "umhverfissinna" allsráðandi þegar atvinnumál eru rædd. M.a. talar Dofri gegn stóriðju en bendir svo á að efla skuli starfssemi flugvallarins á Miðnesheiði. Það er ekkert annað en stóriðja sem útheimtir mikla orku í formi olíu að efla flugvallarstarfssemi. Áttar fólk sig ekki á því? Því ef eitthvað er það sem skilgreinir stóriðju vel þá er það starfssemi sem þarf mikla orku. Þ.m.t. er nútíma ferðamannaiðnaður, því ekki ætlast fólk til þess að ferðamenn komi hingað á skinnbátum og fari eingöngu um landið á tveimur jafnfljótum. Ef efla á ferðamannaiðnað á Íslandi þarf m.a. fleiri olíuhreinsistöðvar. Ég get vel skilið að fólk vilji ekki olíuhreinsistöð á Vestfjörðum. En að leggja til að efla skuli ferðamannaiðnað í staðinn, er það sama og leggja til að aðrar þjóðir geta haft þessar "mengandi olíuhreinsistöðvar" hjá sér en við þurfum að kaupa meiri olíu fyrir okkar ferðamannaiðnað.

Áttar fólk sig ekki á samhengi hlutanna? Nú fyrir utan það að ál er notað í mörg farartæki og er aukin framleiðsla þess afleiðing af m.a. "auknum ferðamannaiðnaði".

[Örvar Þór Kristjánsson, 19.2.2008 kl. 13:47]

Sæll Dofri

Ég sem fæddur og uppalinn Njarðvíkingur hef jú kynnt mér og skoðað Reykjanesskagann.  Það er margt fallegt að skoða en ég tel stóra hluta hans ekki sem náttúruperlur.  Þú ert umhverfissinni og bendir á uppbygginguna við flugvöllinn, sem er alveg frábært reyndar.  En rakst á þetta...

Farþegaflug og vöruflug, þ.e. flug frá og til Íslands og innanlands, ferðarmannaðariðnaður stæðsti mengunar valdurinn á Íslandi og stæðsta stóriðjan, nemur um 4.2 milljónum tonna af CO2, sem er svipuð og losun 17 álvera á CO2 eins og þau eru hér á landi.

Það er svo undarlegt að sjá ykkur umhverfisverndarsinna fara hamförum í baráttunni gegn Álverum en vera svo ekki samkvæmir sjálfum ykkur þegar það kemur að öðrum iðnaði.  Hreint með ólíkindum.  Þið verðið að vera samkvæmir sjálfum ykkur annars eruð þið ekki marktækir.  Rangfærslur og vitleysan sem vellur oftar en ekki upp úr ál-andstæðingum er sorgleg.

Álver er alls ekki slæmt, það er góður kostur fyrir okkur hérna fyrir sunnan.  Einnig vil ég sjá Álver rísa á Bakka.

[Guðmundur E.Jóelsson (IP-tala skráð) 24.2.2008 kl. 00:46]

Mér finnst fólk ekki tala hér af mikilli vanþekkingu á hvað er í gangi hér ,það er búið að semja um öll grundvallaratriði varðandi rafmagn til álversins í Helguvík.Það liggur alveg ljóst fyrir hvar verksmiðjan á byggjast menn þurfa aðeins að kynna sér það með því að skoða skipulag í Garði eða Reykjanesbæ,það er búið að semja um hvaðan rafmagnið kemur ,Norðurál er tilbúin til að hefja framkvæmdir en það eru opinberir aðilar sem hiksta , gera menn sér grein fyrir því að laun munu hækka að meðaltali umtalsvert ,að þegar að vinnsla hefst í álverinu verða til 300-400 störf og 6-700 afleidd störf í samfélaginu ,ég held að menn verði að átta sig því hvað þetta er nauðsynlegt fyrir alla íbúa hér á Reykjanesi ,og þetta er rétt handan við hornið.

[Guðmundur E.Jóelsson (IP-tala skráð) 24.2.2008 kl. 00:49]

Mér finnst fólk ekki tala hér af mikilli þekkingu á hvað er í gangi hér ,það er búið að semja um öll grundvallaratriði varðandi rafmagn til álversins í Helguvík.Það liggur alveg ljóst fyrir hvar verksmiðjan á byggjast menn þurfa aðeins að kynna sér það með því að skoða skipulag í Garði eða Reykjanesbæ,það er búið að semja um hvaðan rafmagnið kemur ,Norðurál er tilbúin til að hefja framkvæmdir en það eru opinberir aðilar sem hiksta , gera menn sér grein fyrir því að laun munu hækka að meðaltali umtalsvert ,að þegar að vinnsla hefst í álverinu verða til 300-400 störf og 6-700 afleidd störf í samfélaginu ,ég held að menn verði að átta sig því hvað þetta er nauðsynlegt fyrir alla íbúa hér á Reykjanesi ,og þetta er rétt handan við hornið.