Vandlifað!

Ýmislegt hef ég heyrt andstæðinga utanríkisráðherra segja henni til lasts en það er nýtt að brigsla henni um leti við að ferðast til útlanda með almennum flugvélum.

Það var reyndar viðbúið að það heyrðust vandlætingarhljóð úr horni þingflokks Vinstri grænna en ég held að Álfheiður ætti að skoða málið betur áður en hún hneykslast meira.

Henni og öðrum til hugarhægðar get ég upplýst að mismunurinn á að ferðast með ráðherrana og sendinefndina með áætlunarflugi eða leiguflugi (ekki einkaþotu) var aðeins lítið brot af því sem hinir frjóu blaðamenn á visir.is fundu út.

Eins og kemur fram í frétt mbl.is áttu utanríkis- og forsætisráðherra áríðandi fund með bankastjórn Seðlabankans síðdegis í gær. Flestir ættu að geta verið sammála um það það sé frumskylda þessara helstu ráðamanna þjóðarinnar að takast á við þann efnahagsvanda sem við stöndum frammi fyrir.

Auk þess hefði þurft að fara með stóra sendinefnd í gegnum Heathrow þar sem allt hefur verið stopp og strand undanfarna daga. Er það þannig sem við viljum að okkar fólk nýti tímann sinn? Á aukalegum dagpeningum á Heathrow og hóteli í London í stað þess að takast á við efnahagsmálin og mæta á réttum tíma á Natófundi?

Ég er sjálfur mjög hlynntur því að nota almenningssamgöngur sem mest og ferðast því oft til og frá vinnu með strætó. En þegar ég hef skamman tíma til að koma mér á milli áríðandi funda og sé fram á að ná því ekki með strætó - þá tek ég frekar leigubíl en að skrópa í vinnunni!

Ferðamáti gagnrýndur

Athugasemdir

[Óskar Þorkelsson, 2.4.2008 kl. 20:44]

ég er nú þeirrar skoðunnar að þessi för sé algerlega ónauðsynleg.. bruðl.. leikaraskapur.. það hefði verið nær ef þau hefðu verið heima og sinnt aðkallandi málum innanlands en að leika sér með hershöfðingjum Nato.

[Gísli Baldvinsson (IP-tala skráð) 2.4.2008 kl. 20:50]

Ég telst nú ekki yfirlýstur andstæðingur utanríkisráðherra en við höfum ekki lyfst það langt frá jörðu á 10 mánuðum að jarðsambandið hafi rofnað. Fólk (ekki bara Vg) vill fá skýringu á þessum kostnaði. Ef þetta er eins og þú segir þá er það bara svo. En ... ef tilvitnunin í ráðuneytisstjóra forsætisráðuneytisins er rétt, það er að kostnaðurinn verður ekki gefinn upp þá er það vont mál. Það er stærra mál en borga bleyjur og Tolbelrone með vitlausu korti.
Er það sem sagt rangt að hér muni sex miljónum á ferðamáta? Hvaðan hefurðu það og ert þú (græntengdur) sáttur við að almenningur fái ekki betri upplýsingar? Ekki tala niður til fólks Dofri.

[Sævar Helgason, 2.4.2008 kl. 20:51]

  Ljóst er að tími , bæði forsætisráðherra og utanríkisráðherra er dýrmætur þessa dagana vegna efnahagsástandsins .  Að komast til Búkarest er ekki beint í þjóðbraut á almennu farþegaflugi. Það eru tímafrekar krókaleiðir þangað frá Íslandi og til baka aftur.

 Að taka leiguflug á fund NATO í Rúmeníu sýnist mér vera afargott verklag.

[Óskar Þorkelsson, 2.4.2008 kl. 21:40]

tilhvers var farið á fundinn ?? 

[Guðmundur Björn, 2.4.2008 kl. 21:40]

Bara vegna þess að orðið einkaþota er í fréttinni eru smáborgarskapur einstakra Íslendinga að fá útrás?  Er ekki fólk sem er staðgenglar ráðherra ef þau eru ekki á landinu?  Er fólk virkilega svona einfalt.  Hvað skiptir þetta máli?  Þetta er greinilega ódýrara, fljótarara og skilvirkara.  

Vinkona mín vann ritgerðarsamkeppni um Japan fyrir nokkrum árum og fékk ferð til Japans fyrir vikið.  Hún laumaði því að mér að miðinn hefði kostað 500.000 krónur....ekki heyrðist í þessum mannvitsbrekkum sem hér eru að væla varðandi þann kostnaðlið sem ríkið fór út í!!  Ónei....ekki nógu bitastætt til að væla og orga yfir.

Ég segi nú bara eins og hann þarna í júróvisjón...glymur hátt í tómum tunnum! 

[Gunnar Th. Gunnarsson, 2.4.2008 kl. 21:48]

Þett er fólkið Dofri minn, sem þið leiddust hönd í hönd við árum saman í stjórnarandstöðu. Og ég man nú svo sem eftir vandlætingartóninum í ykkur Samfylkingarfólkinu líka, og ekki af stærra tilefni.

[Ásthildur Cesil Þórðardóttir, 2.4.2008 kl. 22:04]

Málið er að þegar stjórnvöld eru að fara fram á að almenningur herði sultarólina og spari, þá verkar þetta illa á mann.  Svona pólitískt séð þá er þetta gönuhlaup, og sýnir að ráðamenn eru ekki í neinum takti við almenning í þessu landi.  Talandi um væl og org í fólki, þá vil ég bara segja að íslenskur almenningur hefur látið vaða yfir sig árum saman án þess að gera neitt í málunum.  Að vísu aðeins röflað út í horni.  En ég held að fólk sé núna búið að fá nóg.  Og svona til fróðleiks, þá get ég sagt að margir samfylkingarmenn úti á landi eru hættir að tala um flokkinn sinn og svara fáu ef maður opnar umræðurnar um stjórnsýsluna.  Það segir meira en mörg orð.  Fólk er einfaldlega að fá nóg, það sýnir núna mótmæli bílstjóranna og samúðin sem þeim veitist. 

[Dofri Hermannsson, 2.4.2008 kl. 23:33]

Gísli, finnst leitt ef þér finnst ég hafa talað niður til fólks. Það var ekki meiningin og ég á erfitt með að sjá það út úr færslunni þegar ég las hana aftur áhyggjufullur á svip af því ég tek alltaf mikið mark á því sem þú segir.

Sammála því að það eigi að upplýsa um þennan kostnað. Annað er bara kjánalegt.

[María Kristjánsdóttir, 2.4.2008 kl. 23:52]

Eru ekki líka einkaþotur mestu umhverfissóðarnir? Og svo þessi fundur. Hvers vegna var farið? Af hverju ekki rætt við utanríkisnefnd? Kemur þjóðinni þetta ekkert við? Ég held að þjóðinni finnist nokkuð skrýtið að fyrrverandi friðarsinninn Ingibjörg Sólrún sé þarna í faðmi Condolisu Rice og hafi mestan áhuga á að stofna klúbb með henni. Sorry, IS hefur valdið mér djúpum vonbrigðum.

[Lilja Guðrún Þorvaldsdóttir, 3.4.2008 kl. 00:23]

Þau áttu bara að nota tækifærið, vegna ástandsins hér heima og segja Ísland úr Nató. þá væru þessi  ferðamál úr sögunni. Ég hefði stutt það.

[Eva Benjamínsdóttir, 3.4.2008 kl. 00:52]

Já Ísland úr Nátó! það hefði verið gráupplagt Lilja, sammála þér.

Dofri mér finnst þú vanda þig. Gangi vel,  takk f/ mig. 

[Hólmdís Hjartardóttir, 3.4.2008 kl. 02:25]

Dofri, ég kaus Samfylkinguna eins og þú. En mér finnst óhæfa að ráðamenn leigi sér einkaþotur...skilaboðin til þjóðarinnar eru svo röng.

[Ólafur I. Sigurgeirsson (IP-tala skráð) 3.4.2008 kl. 09:37]

Sæll Dofri. Mér finnst svolítið vandræðalegt (en þó táknrænt) ef samfylkingin er að hverfa frá hinu "fagra ísland"-i í einkaþotu. Og hvað varð um samræðustjórnmálin? Gleymdist ekki að ræða fundarerindið í utanríkismálanefnd?

p.s. Vonandi er áfyllingin á þotuna fyrir bakaleiðina á vægu verði. Við meigum jú ekki bruðla með gjaldeyri. Var það ekki annars umræðuefni fundarins mikilvæga með DOddssyni?

[sungam (IP-tala skráð) 3.4.2008 kl. 10:08]

Ótrúlegt hvað það virðist stíga sumum til höfuðs og verða öðrum til veruleikafirringar að verða (b)varaborgarfulltrúar. Að rembast við að verja þessa vitleysu er ekki ósvipað og mæla með því að forseti vor ferðist um í hylkjum Baugs og á sama tíma gæti hagsmuna þeirra t.d. með neitunarvaldi fjölmiðlafrumvarps. Dofri, þú ættir að skammast þín fyrir að bera þetta á borð, skilurðu ekki "litli karl" að landið logar vegna skelfilegrar stöðu almennings í fjárhagsþrengingum. Það er nóg að gera hérna heima fyrir pólitíkusa. Hvað er þetta með ykkur Samfylkingarfólk, er þetta sértrúarsöfnuður þar sem meðlimir trúa að hvítt sé svart ? Pistill þinn er hlaðinn hroka og ber vott um algjört sambandsrof við alþýðu þessa lands.  

[Tryggvi (IP-tala skráð) 3.4.2008 kl. 11:57]

En hvað með útblásturinn úr einkaþotunni? Er þátttaka á fundi stríðsmangara mikilvægari en losun gróðurhúsalofttegunda? Og stærsta spurningin er kannski þessi: Verður flugið kolefnisjafnað og hver á að borga fyrir það? Ha?

[Jón Sigurður, 3.4.2008 kl. 12:18]

"Henni og öðrum til hugarhægðar get ég upplýst að mismunurinn á að ferðast með ráðherrana og sendinefndina með áætlunarflugi eða leiguflugi (ekki einkaþotu) var aðeins lítið brot af því sem hinir frjóu blaðamenn á visir.is fundu út."

Þú hefur þá semsagt undir höndum reikningsdæmið sem sýnir þennan mun? Er þá ekki bara málið að gera það opinbert. Þeð er nú varla í anda Samfylkingarinnar að fara að fordæmi forsætisráðherra og segja að þetta verði aldrei gert opinbert vegna heiðursmannasamkomulags við leigusalann.

Í öðru lagi þá  gengur reikningsdæmið ekki upp nema það hafi verið gert ráð fyrir því að ráðherrarnir og allt fylgdarliðið hafi átt að fljúga á Saga Class alla leið og ef það hefði verið eytt einni nótt í London hefði það verið á rándýrri svítu á flottasta hóteli borgarinnar.

Þú segist hafa gögnin. Endilega leiðréttu mig ef ég fer með rangt mál.

[Pálmi Gunnarsson, 3.4.2008 kl. 12:49]

Nato er skítadeild sem við ættum að yfirgefa eins og hvert annað pestarbæli. Þess utan eru skilaboðin með þotuleigunni röng. Siðferði í stjórmálum kemur fram með ýmsum hætti og ef ég man rétt var ráðherra í ríkisstjórn Dana látin taka pokann sinn um árið fyrir það eitt að skipta um hótel í opinberri ferð og greiða fyrir með almannafé. Góður vinur minn sem búið hefur í Svíþjóð um árabil segir að þar í landi sé lagt uppúr að ráðamenn berist ekki á og að þeir séu fyrirmynd.

Jú vissulega væri gaman að sjá reikninginn fyrir þotunni, sem verður trúlega aldrei ... ekki frekar en kosningasjóðir flokkanna.

[Dofri Hermannsson, 3.4.2008 kl. 15:00]

ISG og GHH héldu fund með bankastjórn Seðlabankans síðdegis í fyrradag einmitt vegna ástandsins í gengis- og fjármálum banka og almennings.

Það er undarlegt að skamma þau fyrir að finna leið sem aðeins kostaði um 200 þ kr. meira og gerði þeim mögulegt að halda þennan mikilvæga fund áður en þau fóru á Nató fundinn þegar menn lýsa ástandinu þannig "að landið logar vegna skelfilegrar stöðu almennings í fjárhagsþrengingum".

Ég held að fólk sé að rugla saman þotuliðinu á einkaþotum útrásarfyrirtækjanna og því að ná sér í hagstætt far með leiguflugvél til að spara tíma.

Ef það er hroki að líta svona á málið þá verður bara að hafa það.

[Sigrún Jónsdóttir, 3.4.2008 kl. 17:06]

Dramb er falli næst!  Ef fallið er það sem þið viljið Dofri minn, þá verður bara að hafa það.

[Óðinn Þórisson, 3.4.2008 kl. 20:02]

VG er sá flokkur sem ég hef hvað minnst álit á og þegar Álfheiður Ingadóttir tjáir sig er ég nær undanteknigalaust ósammála henni.

Góður pistill hjá þér Dorfi og er ég þér sammála.

[IG (IP-tala skráð) 4.4.2008 kl. 11:21]

Æ leyfum kommúnistum og rugludöllum þessa lands að rífast yfir notkun á leiguflugi... Þeir eru þá ekki að trufla umræðu sem skiptir máli á meðan.

[Dofri Hermannsson, 4.4.2008 kl. 22:11]

Jurgen. Ég hef þessar upplýsingar frá aðstoðarmönnum viðkomandi ráðherra og rengi þá ekki um þessar tölur. Hins vegar er ég alveg sammála því að það á gefa þessar tölur upp - annað er bara klaufalegt og vekur grunsemdir um að þær séu ekki réttar.

Opinberum viðskiptum er ekki hægt að halda leyndum (nema orkuverði LV) þótt leiguflugfélagið hafi gefið afslátt sem það vill ekki að allir viti um.

Í stað þess að tala um umræðu á lágu plani hefði verið einfaldara að þakka fyrir áhugaverða spurningu og segja bara einfaldlega strax hvað þetta kostaði.

En leiguflugið finnst mér fyllilega eiga rétt á sér miðað við gefnar forsendur.

[Hafsteinn Viðar Ásgeirsson, 5.4.2008 kl. 12:30]

Sammála þessum pistli hjá þér Dofri.

Eins get ég tekið undir hvert orð í athugasemd sem Óðinn gerir hér, ásamt fleiri í sama dúr.

[Hafsteinn Viðar Ásgeirsson, 5.4.2008 kl. 12:36]

Gleymdi að geta þess að ég hef orðið samferða ISG með Iceland Express þegar þeir voru að byrja. Ég man ekki til þess að hafa séð þar aðra sem eru að ferðast á kostnað ríkis eða Reykjavíkurborgar, þeir eru oftar á Saga Class hjá Icelandair, eins og allir vita sem eru að ferðast með þeim.