Hvar á að taka orkuna í Helguvíkurálverið?

Þessi pistill er enn í fullu gildi.

Það er vandséð hvar Helguvíkurálverið ætlar að fá þá orku sem það þarf til að komast í 250 þúsund tonn - hvað þá þau 350 þúsund tonn sem Árni Sigfússon talar um við fjárfesta og vitað er að þarf til að álverið skili góðri arðsemi.

Fyrir 1. áfanga þarf um 260 MW
Fyrir 250 þúsund tonna álver þarf 435 MW
Fyrir 350 þúsund tonna álver þarf 609 MW

1. áfangi - bjartar vonir!

Samkvæmt björtustu vonum telur HS sig geta útvegað 170-185 MW en sumt af þeim virkjunum á eftir að fara í gegnum umhverfismat og hluti orkunnar er bundið samningum sem losna ekki fyrr en 2011.

OR er bundin samningi um 100 MW til 1. áfanga svo ef björtustu vonir HS rætast næst að skrapa saman nægri orku fyrir 1. áfanga.

Kíkjum þá á 2. áfanga.

OR ætlaði að útvega 75 MW en ljóst er að þegar búið er að efna samninginn um 100 MW og samning um orku til stækkunar á Grundartanga eru ekki nema um 30 MW eftir sem þarf til að anna aukinni eftirspurn á almennum markaði. Hjá OR er því ekkert að hafa, þrátt fyrir viljayfirlýsinguna.

HS horfir löngunaraugum til Krýsuvíkur og er með rannsóknarleyfi á fjórum svæðum. Samkvæmt björtustu vonum eiga þau nú að gefa 100 MW hvert (var áður 80 MW!). Þessar vonir eru þó brothættar, aðeins er búið að bora eina holu á einu svæði og sú hola reyndist þurr.

Ekki er vitað hvort hin svæðin munu gefa betri raun en þess utan er þarna um að ræða afar verðmæt hverasvæði sem ljóst er að mikil barátta mun verða háð um af hálfu þeirra sem vilja nýta svona svæði með verndun þeirra.

Landsvirkjun hefur gefið út yfirlýsingu um að ekki verði seld orka til nýrra álvera á suðvesturhorni landsins. Þar er því enga orku að fá til Helguvíkurálvers.

Það er því langur vegur frá því að búið sé að tryggja nokkra af þeirri orku sem þarf til 2. áfanga Helguvíkurálversins. Hvað þá þriðja áfanga. Til þess vantar um 340 MW!

Hvað ræður för?

Hvar ætla mennirnir að taka orkuna sem þarf til klára dæmið - þessi 340 MW?
Hvaða hugsun býr að baki því að soga alla hugsanlega orku af svæðinu til þessa eina verkefnis?
Af hverju finnst stjórnendum HS/Reykanesbæjar verra að fá til sín fleiri meðalstór fyrirtæki með orkuþörf upp á 10-50 MW eins og sagt er frá í ársskýrslu HS að þurfi að vísa frá vegna orkuskorts?

 

Engir orkusamningar á næstunni

Athugasemdir

[Púkinn, 20.5.2008 kl. 19:28]

..og ekki gleyma því að þessi litlu fyrirtæki myndu hugsanlega borga meira fyrir hvert MW en álrisarnir sem geta samið verðið niður í skjóli stærðar.

Púkinn vill frekar sjá meiri fjölbreytni í atvinnulífinu en endalaus álver. 

[Lilja Guðrún Þorvaldsdóttir, 20.5.2008 kl. 21:24]

Elsku Dofri minn nú á að etja áhangendum Helguvíkurálversins gegn andstæðingum slíkra framkvæmda. 

Nú á að fara í leikinn allir gegn öllum. - Og sjáum svo hver vinnur.- 

 Sá vinnur sem sigrar án þess að hafa nokkuð til þess unnið !

- Svaraði barnið spurningu minni, sem ég hafði varpað fram, og ekki haft hugmynd um,  að barnið hefði verið að hlusta á það, sem ég var að lesa upphátt fyrir fullorðna frænku mína, hér á blogginu þínu.

[Halldór Halldórsson (IP-tala skráð) 21.5.2008 kl. 13:38]

Mikið vildi ég óska þess að uppgötvuð yrði aðferð til að láta þig og þína líka líða fyrst og mest fyrir þessar afturhaldsákvarðanir í orku- og stóriðjumálum, sem þjóðin verður líklega að umbera í nokkur ár; eða allt til þess að henni verður ljóst að það er ekki hægt að lifa nema mjög skamman tíma á loftinu.  En hver veit nema að biðin verði þess virði, að fá að fylgjast með því þegar þið verðið úthrópaðir, vonum seinna, sem þjóðníðingar?

[Dofri Hermannsson, 21.5.2008 kl. 14:17]

Hvar lærðir þú mannasiði Halldór Halldórsson?

[Halldór Halldórsson (IP-tala skráð) 21.5.2008 kl. 14:56]

Mér er nú slétt sama um hvort mínir mannasiðir og kurteisisvenjur fara í taugarnar á þér.  Ég sé heldur ekki minnstu ástæðu til að tala tæpitungu við þá sem ætlast til að aðrir sjái fyrir þeim og styrkja- og ölmusukerfi þeirra; en vilja jafnframt hafa valdið til að segja þeim hvernig þeir eigi að fara að því að halda þeim uppi.  Þess vegna finnst mér sjálfsagt að afæturnar fái að finna fyrst fyrir samdrætti í lífskjörum; sé það mögulegt!  Það er þó líklega ómögulegt miðað við illskiljanlega þörf margra til að sýna "mannasiði" sem þið veljið alltaf að skilja sem linkuhátt og undanlátssemi.  Síðan er gengið á lagið.

Í Hafnarfirði er það t.d. nú orðið mörgum ljóst, að þeir voru dregnir á asnaeyrunum til að segja nei við stækkun álversins; til mikils tjóns fyrir bæjarfélagið.  Megi bæjarfulltrúar Samfylkingarinnar þinnar hafa ævarandi skömm fyrir afstöðuleysi sitt og það þýðir bara ekkert fyrir þá að iðrast þess nú!

[Dofri Hermannsson, 21.5.2008 kl. 15:29]

Ósköp ertu hnjóðsyrtur og bölsýnn Halldór. Ég held það sé alveg ástæðulaust.