Skynsamleg nálgun

Loftslagsmálin virða ekki landamæri þjóðríkja frekar en önnur umhverfismál. Afleiðingar hlýnunar loftslags geta verið alvarlegar fyrir okkur Íslendinga ekki síður en aðrar þjóðir. Þorskurinn og aðrir nytjastofnar færa sig norðar, Golfstraumurinn gæti breytt um styrk og stefnu, jöklar hverfa og vatnsforði minnkar en yfirborð sjávar hækkar sem skapar víða flóðahættu.

Annars staðar í heiminum eru tugir og jafnvel hundruð milljóna í hættu vegna fellibylja, flóða og þurrka. Þessar hörmungar munu valda uppskerubresti, hungri, fólksflótta, átökum og aukinni hættu á farsóttum. Slíkt ástand kemur okkur öllum við. Það er því skynsamlegt að vinna með nágrannaþjóðum að sameiginlegri stefnu í þessum málum.

Norræn stefna í umhverfismálum

Athugasemdir

[Sigurjón Pálsson (IP-tala skráð) 15.6.2009 kl. 13:48]

Einmitt Dofri.

Hluti af þeirri ábyrgð sem Íslendingar gætu axlað í alþjóðlegu samhengi, væri að Íslendingar framleiddu  eins mikið og  þeir gætu með góðu móti, t.d. af áli.

Hvert framleitt tonn hjá næstu nágrönnum okkar útheimti 14 sinnum meiri losun gróðurhúsategunda en tonnið sem við íslendingar framleiðum. 

Þessi mengun heldur sig nefnilega ekki bara yfir iðnaðarsvæðum í Evrópu heldur dreyfist um og fáum við hana yfir okkur í auknum mæli eins og aðrir.  

[Dofri Hermannsson, 15.6.2009 kl. 19:48]

Eflaust fallega meint hjá þér Sigurjón en byggir á grundvallar misskilningi. Við verðum að hætta að arðræna auðlindir og snúa okkur að því að endurvinna það sem búið er að gera. Það þarf gjörbreytt viðhorf bæði í iðnaði og hjá neytendum. Þar getur Ísland lagt lið með því að sýna hvernig við sem eyríki getum orðið sjálfbær um vistvæna orku.

Googlaðu "the story of stuff" og horfðu á myndbandið en þar er fjallað um lokaða ferla og fleira skemmtilegt. Að bjóða vistvæna orku á spottprís til að subbuiðnaður eins og að búa til iðnaðarál úr súráli geti grætt aðeins meira nokkrum áratugum lengur verður aldrei nein lausn.

[Einar Þór Strand, 15.6.2009 kl. 22:36]

Loftlagsbólan er líka loftbóla Dofri og hún springur eins og aðrar bólur og atar þá skít sem verða of nálægt, og bara til að minna á það þá hefur hún ekkert með umhverfisvernd að gera heldur græðgi.

[Sigurjón Pálsson (IP-tala skráð) 16.6.2009 kl. 08:35]

Ál  verður framleitt um ófyrirsjáanlega framtíð.  Heimurinn þarf á því að halda vegna eiginleika þess  m.a.til að létta farartæki og draga með því úr mengun í flutningsgeiranum.  Ómar, þú? og aðrir umverfis“verndar“sinnar þurfið ál í auknum mæli í flugvélaranar og önnur faratæki sem smíða þarf svo hægt sé að koma öllum þeim milljónum ferðamanna sem þið viljið koma hingað með flugvélum sem svo reyndar menga marfalt meira en álver.   Útreikningar sýna að útblástur frá flugvélum, sem hingað koma nú, með þessa hálfu milljón ferðamanna, sem sækir landið heim sl. ár, nemur sem samsvarar CO2 útblæstri 16 álvera! 

Þá á reyndar eftir að taka tillit til annarrar mengunar og átroðnings sem þær tvær milljónir ferðamanna valda , sem talað er um að æskilegt sé að hingað komi árlega og að mestum hluta eru hér þrjá mánuði ársins, á viðkvæmri náttúru landsins.  Nokkuð sem ég heyri aldrei minnst á þegar aukning ferðamanna er nefnd sem tekjuöflunarkostur í stað stóriðju hverskonar.

Það er barnalegt óraunsæi að halda að hætt verði að framleiða ál allt í einu, einn daginn.  Þess vegna er það mun skynsamlegra að leggja áherslu á að framleiðsla þess valdi sem minnstri mengun á heimsvísu og enginn hreinsibúnaður – enn -  er það skilvirkur að hann komi nálægt því aðjafnast á við það að framleiðslan fari fram með aðferðum sem menga 14 sinnum minna en nú er gert með jarðefnaeldsneyti, sem brennt er.  Það er hægt hér á Íslandi.  Þetta má gera meðan verið er að finna leiðir til að draga úr eftirspurn þess.

Ég er ekki aðdáandi álvera en röksemdarfærsala ykkar nær ekki hringinn heldur einkennist af rörsýn á okkar litla sker hér úti og misskilinni eigingirni á það -  sem jafna má við það heimilt sé að pissa allstaðar nema í eitt hornið í sundlauginni og halda að það horn haldist hreint og hlandlaust.  

Við getum skipt miklu máli í því að draga úr gróðurhúsáhrifunum heimsins með þessum hætti.

[Dofri Hermannsson, 16.6.2009 kl. 10:38]

Ágæti Sigurjón. Eins og vænta mátti er ég ákaflega ósammála þér.

• Frumvinnsla áls verður hætt í fyrirsjáanlegri framtíð vegna mikillar mengunar og orkuþarfar. Önnur efni s.s. koltrefjar munu leysa ál af hólmi.
• Útblástur CO2 frá flugi mun dragast saman á næstu árum. Fjárfestingar í rannsóknum á þessu sviði eru þegar farnar að skila árangri.
• Það er villandi að bera saman álver og ferðaþjónustu. Ferðaþjónusta á Íslandi skilar 260% meira til þjóðarbúsins en öll álverin til samans.
• Ferðaþjónustan er ekki lengur bundin við þrjá mánuði á ári og hefur ekki verið það á þessari öld. Fylgjast með!
• Það er gamaldags uppgjafartuð að segja að hlutirnir muni ekkert breytast jafnvel þótt manni sé ljóst að þeir verða að breytast ef ekki á að fara verulega illa.
• Rörsýn er skemmtilegt nýyrði og leiðir hugan að hugtaki sem á ensku er kallað "end of pipe solutions" en mér virðast hugmyndir þínar um að íslensk náttúra bjargi heiminum frá mengun kolakyntra álvera einmitt vera í þeim anda.

[Sigurjón Pálsson (IP-tala skráð) 16.6.2009 kl. 12:05]

Ég vona svo sannarlega að þessi framtíðarsýn þín verði að veruleika og að það gerist á næstu árum eins og þú segir.

Ég hef samt efasemdir um það og er raunsærri en svo að falla fyrir þínum útópíuspám.  Því miður.  Samfélag þjóða heimsins er það tregðuþrungið og þungt í vöfum að samkomulag ríkja um þessa glæstu framtíðarsýn þína þarf áratugi, etv. hálfa öld til að ná fram að ganga svo einhverju muni því þetta mun gerast hægt, á hraða snigilsins til að byrja með.  Því bera ótal alþjóðasamkomulög, viljayfirlýsingar og aðrar undirskriftir þjóðarleitoga vitni, sem áratugi hefur tekið að ná fram – náist það á annað borð fram. 

Það er skynsemi í því; að vona það besta en búa sig undir það versta og þess vegna tel ég að meiri skynsemi sé fólgin í því sem ég legg til en sú skammsýni að fljóta sofandi að feigðarósi með vonina eina að leiðarljósi meðan allt fer á versta veg. 

Þetta reddast, á ekki við hér!

 

ps:

(ekki kannast ég við að hafa sagt að ferða þjóustan væri bundin við þrjá mánuði, heldur segi ég að ferðamenn séu hér að mestum hluta þrjá mánuði ársins og stend við það. Fara rétt með!)

(Þá er það einnig útúrsnúningur hjá þér að ég telji; „að íslensk náttúra bjargi heiminum frá mengun kolakyntra álvera“ og verð því aftur vísa í orðin sem ég skrifaði hér að ofan; „Við getum skipt miklu máli í því að draga úr gróðurhúsáhrifunum heimsins með þessum hætti“ og ég stendi við þau orð og frábið mig hjálpar þinnar að leggja út frá orðum mínum ef það er ekki gert af meiri vandvirkni.)

[Sveinn Atli Gunnarsson, 18.6.2009 kl. 23:09]

Hlýnun jarðar er vandamál sem að við verðum að taka alvarlega og jarðarbúar (þar með taldir Íslendingar) verða að byrja að minnka losun gróðurhúsalofttegunda allverulega á næstu árum og áratugum. Hlýnunin er af völdum okkur mannfólksins og það er í okkar höndum að minnka losunina. Þetta er ekki okkar einkamál, þetta er einnig mál sem afkomendur okkar þurfa að lifa við. Það er hægt að ná langt með viðhorfsbreytingum, eins og ég hef skrifað færslu um, sjá hér.