Siðareglur og siðferðisleg meðvitund

Þetta er afar þörf umræða og verkefni að vinna að. Það verður hins vegar að horfast í augu við það að þessa baráttu vinnum við ekki eingöngu með boðum og bönnum, framhjá þeim er alltaf hægt að komast.

Best er ef neytendur eru sjálfir mjög meðvitaðir það þegar sölumennsku er beint að börnum með óviðeigandi hætti. Ef meðvitund neytenda er sterk hvað þetta varðar þá er það mikil hvatning fyrir fyrirtækin að passa upp á siðferði auglýsinga sinna.

Það er líka mikilvægt að SÍA, samband íslenskra auglýsingastofa, fylgi fast eftir siðareglum sínum og gefi viðskiptavinum sínum ákveðin skilaboð um hvað er við hæfi og hvað ekki. Ég þekki það vel frá því ég vann sjálfur á auglýsingastofu að þrýstingur markaðsfulltrúa fyrirtækja á að fylgja eftir vondum hugmyndum getur verið mikill.

Ég fékk eitt sinn það saklausa verkefni sem texta- og hugmyndasmiður að markaðssetja nærföt handa unglingum fyrir búð sem verslaði með alls kyns unglingafatnað. Markaðsstjórinn vildi gjarna að nærfötin yrðu auglýst á dálítið ögrandi hátt og við í verkefnateyminu gerðum okkur ferð í Smáralindina að skoða varninginn. Við töldum að þarna hlyti að vera að ræða vörur fyrir krakka á menntaskólaaldri.

Varningurinn sem til stóð að yrði aðalefni auglýsingaherferðarinnar var eingöngu fyrir stelpur og reyndist vera ósköp venjulegur nærfatnaður með heldur óvenjulegum myndum og áletrunum. Þar á meðal nærbxur með mynd af krana og áletruninni "Turn me on" og aðrar með mynd af sætri kisu og áletruninni "Pet my pussy". Við spurðum afgreiðslufólkið hvaða aldur væri helst að versla í þessari búð var okkur sagt að það væru 80-90% stelpur frá 12-14 ára.

Við fórum til baka og bárum málið undir eiganda stofunnar. Svar hans var skýrt: "Við gerum ekki svona!" Það voru góð skilaboð jafnt til okkar á auglýsingastofunni og markaðsfulltrúi fyrirtækisins sá að sér. Niðurstaðan varð því sú að sleppa algerlega hinum ögrandi undirtóni og leggja áherslu á annað.

Vilja stöðva markaðssókn gagnvart börnum

Athugasemdir

[Bragi Þór Thoroddsen, 13.6.2007 kl. 15:35]

Sæll Dofri.

Í mínum huga er þetta ósköp einfalt: 

Það er verið að brjóta þessar reglur í dag.  Markaðssetning á ekki að vera á fólk sem ekki hefur í raun aldur til þess að taka ákvarðanir.  Það má markaðssetja hvern fjandann sem löglegt er annars á foreldra og forráðamenn en allt sem snýr beint að krökkum og börnum sér í lagi á að vera hlutlaust. 

Hver hefur ekki setið með börnum sem eru að fara að horfa á myndband eða dvd - keyrt er á svala, lego og guð má vita hverju áður en myndin hefst.  Uppáhalds myndband sonar míns í miðið er svalauglýsingin. 

Þetta er tvöfalda siðferðið sem er líka í gangi varðandi áfengisauglýsingarnar. 

Það er oft góður sannleikur í Boston Legal; lögfræði 101 þar sem BNA menn eru alla jafna ýktir í sínu.  Þar var einmitt tekið á þessu vandamáli með nærfötin og það rætt í kjölinn:  Dúkkur sem voru í einhverju sexy outfitti. 

Þarna er lagasetningar í heild þörf (þ.e. endurskoðun) enda er siðferði vort að breytast hratt.  Á sama tíma þykjumst við geta dæmt unglinga í fangelsi fyrir að sofa hjá aðeins yngri unglingi.  Undir 18 og málið dautt.

Gott innlegg í annars daufa umræðu á miðlum og neti undanfarið.

Takk

vcd