Til hvers álbræðslu í Helguvík?

Ég er einn þeirra sem á erfitt með að skilja rökin fyrir álbræðslu í Helguvík. Á næstu 10 árum er gert ráð fyrir um 2000 nýjum störfum við Flugstöðina og ýmis starfsemi á gamla Vellinum mun skapa fjölda starfa við allt milli himins og jarðar.

Eins og fréttir herma er fólki mjög að fjölga á Suðurnesjum. Þar kemur margt til, t.d. fjölgun starfa við Flugstöðina og ný starfsemi á Vellinum en líka sú staðreynd að með bættum samgöngum og hækkandi húsnæðisverði í Reykjavík eru Suðurnesin að verða ákjósanlegt svæði að búa á jafnvel þótt önnur fyrirvinna heimilisins vinni á höfuðborgarsvæðinu. 

Atvinnusvæðið er að verða eitt og hið sama allt frá Borgarfirði til Selfoss og Suðurnesja.

Reykjanes er stórbrotið náttúrusvæði og býður upp á ótal möguleika sem útivistarsvæði. Hópur fólks sem þekkir vel til svæðisins heldur úti heimasíðunni www.ferlir.is en heimasíðan er mikill fróðleiksbrunnur um Reykjanesið, náttúru þess og menningarminjar. 

Þessi miklu verðmæti bíða þess eins að verða uppgötvaðar af almenningi og ferðaþjónustuaðilum. Fyrir ferðaþjónustuna er æ mikilvægara að geta boðið upp á dagsferðir í fjölbreytta og stórbrotna náttúru. Reykjanes, náttúra þess og saga er hin sanna auðlind þessa svæðis.

Álbræðsla í Helguvík myndi að kosta línulagnir eftir endilöngu Reykjanesi og hvort sem þær verða lagðar í loft eða plægðar niður í jörð munu þær stórskemma svæðið sem útivistarsvæði og möguleika þess sem eldfjallaþjóðgarðs. 

Álbræðsla í Helguvík myndi einnig kosta afar umdeildar virkjanir í neðri Þjórsá og eyðileggingu á Urriðafossi, einum vatnsmesta fossi landsins. Ekki er ólíklegt að einu fjölbreyttasta hverasvæði landsins við Ölkelduháls þurfi líka að fórna ef af verksmiðjunni verður.

Álbræðsla í Helguvík myndi þurfa vinnuafl sem ekki er til staðar á svæðinu. Margir óttast ruðnings- og þensluáhrif á Suðurnesjum vegna þessa og að svæðið muni hafa slæm áhrif á byggðaþróun á Suðurlandi. Ljóst er að við núverandi aðstæður hefði verksmiðjan slæm áhrif á hagkerfið og ýtti enn undir þenslu á svæði sem er nógu þanið fyrir.

Álbræðsla í Helguvík virðist því ekki vera það hagsmunamál fyrir íbúa á Suðurnesjum sem af er látið. Þvert á móti má færa fyrir því gild rök að álbræðslan ógni mikilvægum hagsmunum á svæðinu.

Álbræðsla í Helguvík gæti hins vegar verið stórt pólitískt hagsmunamál fyrir Árna Sigfússon, bæjarstjóra. Hann virðist ætla að gera álbræðslu í Helguvík að táknmynd fyrir sjálfan sig sem stjórnmálamann, verksmiðjan á að verða minnisvarði um hann sem bæjarstjóra og þarf að rísa áður en boðað verður til þingkosninga næst.

Það var umhugsunarefni að bæjarstjórinn skyldi í vor neita íbúum um að kjósa um þetta mál. Það er varhugavert þegar pólitískir hagsmunir valdhafa fara ekki saman með hagsmunum íbúanna.