Að axla ábyrgð eða vera flengdur

Það er sjálfsögð krafa til stjórnmálamanna að þeir segi satt. Það fannst Vilhjálmi Þ Vilhjálmssyni líka þegar hann skoraði á Þórólf Árnason fyrrverandi borgarstjóra að segja af sér vegna tengsla hans við verðsamráð olíufélaganna. Þá sagði Vilhjálmur að borgarstjóri hefði farið rangt með og

„Það er mjög alvarlegt mál þegar stjórnmálamenn segja ekki satt og rétt frá. Ég get einfaldlega sagt það að ef ég væri staðinn að svona löguðu þá myndi ég segja af mér."

Nú er eitthvað annað uppi á teningnum. Nú þykist Vilhjálmur hafa axlað ábyrgð þegar hann missti  borgarstjórastólinn sem gerðist hins vegar af því að hann hafði "gleymt" að bera mikilvæg mál undir borgarstjórnarflokkinn sinn sem af þeim sökum varð óstjórntækur vegna innanflokksátaka.

Að axla ábyrgð hefur í mínum huga alltaf falið í sér að taka sjálfviljugur afleiðingum gjörða sinna, t.d. með því að víkja úr sæti í trúnaðarstöðu ef um trúnaðarbrest er að ræða.

Að "lenda í" því nauðugur að missa sæti sitt vegna eigin klúðurs er allt annað og miklu meira í ætt við að fá verðskuldaða rassskellingu.

Það er nú alveg lágmark að borgarstjóraefni Sjálfstæðisflokksins þekki muninn á þessu tvennu.

Athugasemdir

[Árni Gunnarsson, 12.2.2008 kl. 21:42]

Ég er nokkuð viss um að Þórólfur Árnason hefði skilið þá samninga sem Villi skrifaði undir. Sennilega hefði hann verið fær um að semja þá sjálfur.

Það er kostur að stjórnandi stærstu byggðar á Íslandi kunni eitthvað í viðskiptum og rekstri fyrirtækja.

Tími hreppsnefndanna er að mestu liðinn undir lok.

[Guðjón H Finnbogason, 12.2.2008 kl. 22:53]

Þetta kom honum í koll.Þórólfur Árnason var réttur maður á réttum stað þegar hann var Borgarstjóri og minni sakir hans en Villa litla.Vonandi að fólk muni svo eftir þessu þegar kosið verður næst.

[Gestur (IP-tala skráð) 13.2.2008 kl. 01:00]

Hva, þetta voru aðeins "tæknileg mistök" hjá Villa. Ég bíð spenntur eftir að sjá hversu slæm embættisglöp stjórnmálamenn Sjálfstæðisflokksins þurfi að framkvæma til að þeir sæti ábyrgð. Ísland, Nígería Norðursins!

[Theódór Norðkvist, 13.2.2008 kl. 11:29]

Það er enginn heymskur. Aftur á móti eru sumir heimskir.

[Dofri Hermannsson, 13.2.2008 kl. 11:36]

Theódór. Kannski er hér um nýyrði að ræða sem er blanda af gleymsku og heimsku!

[Theódór Norðkvist, 13.2.2008 kl. 13:28]

Já, kann að vera, góður.